बझाङके विद्यालयहे लकडाउन नाइ छुवल

बझाङ, ३ भदौ । कोरोना संक्रमणके त्राससे देशभरके अधिकांश शैक्षिक संस्था चैत पहिल अँठ्वारसे ठप्पप्रायः बावै, मने बझाङके साइपाल गाउँपालिकाके विद्यालयमे भर नियमित कक्षा चलल् बा ।

आघेक बरस बझाङके विद्यालय चैतसे सावनसम बन्द हुये । विद्यार्थी–शिक्षक यार्र्सा संकलनके लाग लेकओर जैना हुइल ओरसे विद्यालयमे सावन पहिल अँठ्वारसे किल भर्ना सुरु होए । यी बरस उल्टा हुइल । लकडाउनसे देशभर शैक्षिक गतिविधि ठप्प होके दुर्गमके साइपालके विद्यालयहे भर बन्दसे नाइ छुवल ।

यहाँ गत वैशाख २ से भर्ना सुरु हुइलपाछे लगत्तै पह्राइ फेन सुरु करल बा । सरकारसे कोरोना महामारी नियन्त्रणके लाग विद्यालय बन्द कैना निर्देशन डेलेसे फेन साइपालमे जोखिम नाइ रहल कहटी अभिभावकहुक्रे नै खोल्न दबाब डेहल गाउँपालिका जनैले बा । बाहिरसे कोइ फेन नाइ अइन ओ स्थानीय फेन काम परलेसे किल बाहर जैना हुइल ओरसे विद्यालय व्यवस्थापन समितिहे स्वस्फूर्त पठनपाठन सुरु करल गाउँपालिकाके शिक्षा इकाईके प्रमुख नरबहादुर धामी बटैलै ।

उहाँ कहलै, ‘साइपालमे कोरोनाके जोखिम नाइहो । हम्रे स्कुल चलाब कहे लग्लै, सक्कु अभिभावक जोरसे खोले परे कहे लग्लै ।’

साइपालमे हालसम किहुहे फेन कोरोना संक्रमण नाइ हुइल ओ आवतजावत फेन नाइ हुइल ओरसे कक्षा सञ्चालनमे समस्या नाइ हुइल शिक्षकहुक्रे बटैठै । ‘यहाँके विद्यालयमे लकडाउनके कौनो असर नाइ परल कलेसे हुइ,’ धुली माविके शिक्षक धनबहादुर विष्ट कहलै, ‘और बेर रहट कलेसे यार्साके कारण विद्यालय बन्द करे परे, यी बरस यार्सा बिटोर्न बन्द हुइल, विद्यालयचाहिँ समयमे खुलल् ।’ प्रशासनके कडाइके कारण सीमित संख्यामे गाउँले यार्सा बिटोर गैल ओ विद्यार्थीहुक्रे नाइ गैल ओरसे कक्षा नियमित रहल उहाँ बटैलै ।

अन्तके विद्यालय बन्द रहल गाउँपालिकासे बाहर पह्रुइया विद्यार्थी फेन यहैक विद्यालयमे भर्ना हुइल बाटै । यिहीसे विद्यार्थी भर्ना दर बह्रल शिक्षा इकाई प्रमुख धामी बटैलै । बाहर पह्रटी रहलहुक्रे फेन गाउँमे आइलपाछे पहिलेसे १५ प्रतिशत ढिउर विद्यार्थी यी बरस भर्ना हुयल उहाँ बटैलै । उहाँ यी बरस विद्यार्थीहुक्रनके नियमित हाजिर दर फेन बह्रल बटैलै । साइपालमे ३ मावि, ५ प्रावि ओ २ निजी विद्यालय रहल बावै ।

विद्यार्थी संख्या १ हजार ३ सय ४७ रहल बा । गर्मीमे यार्सा संकलन ओ हिउँदमे भारी हिमपातसे पह्राइ बन्द हुइना हुइल ओरसे कबुफेन पूरा कोर्स पह्रे नाइ पाइल विद्यार्थी यी बेर खुसी बाटै । ९ कक्षा पुगटमसम जब फेन पूरा कोर्स नाइ पह्रके परीक्षा डेना करल धुलीके छात्रा मुसुरी रोकाया बटैली ।

कोरोनाके जोखिम न्यून रहल ओ अभिभावकहुक्रे फेन दबाब डेहल ओरसे पठनपाठन बन्द नाइ करल गाउँपालिका अध्यक्ष राजेन्द्र धामी बटैलै ।