थरुहट मोर्चाके पूर्व घोषित संघर्षके कार्यक्रम स्थगित
पहुरा समाचारदाता
धनगढी, ४ भदौ । थरुहट थारुवान राष्ट्रिय मोर्चासे कोभिड–१९ के कारण पूर्व घोषित संघर्षके सक्कु कार्यक्रम स्थगित करले बा ।
मोर्चासे बुधके एक विज्ञप्ती मार्फत कोभिड–१९ महामारीके कारण मुलुकमे हुइटी रहल बन्दाबन्दी ओ संक्रमणसे हुइ सेक्ना भयावह स्थितिहे मध्यनजर करटी औरे सूचना जारी नाइ हुइटसमके लाग मिडिया मार्फत भर्चुअल संवाद छलफल कैना मेरके स्थगित करल हो । यिहीसे आघे मोर्चासे साउन २५ गतेसे पाछेक चरणके आन्दोलनके कार्यक्रम सार्वजनिक करल मोर्चासे कोभिडके बीचमे आन्दोलनके कार्यक्रम कैना चेतावनी डेहल रहे ।
साउन २४ गते शनिच्चरके धनगढीमे आयोजित पत्रकार सम्मेलनमे बोल्टी मोर्चाके संयोजक लक्ष्मण थारु कहल रहिट, ‘कोभिडके कारण कौनो कार्यक्रम आ नाइ रोकब । न्यायके आन्दोलनमे कोभिड बाधक नाइ बनी । हमार न्यायिक आन्दोलनहे नजरअन्दाज करल सरकारके लाग हम्रे कोठाभित्रे बैठ डेहे पर्ना ? आब ओइसीन नाइ हुइ । राज्यविरुद्ध असहयोग आन्दोलनहे तीब्र पारब ।’
मोर्चासे टीकापुर घटनामे मुछके जेल जीवन भोगटी रहल सांसद रेशम चौधरीसहित ११ जनहनहे रिहाइके माग करटी आन्दोलनके घोषणा करल रहे । मोर्चासे ३ महिनाभित्रे आपन जेलबन्दीहे रिहाइ नाइ करलेसे प्रधानमन्त्री केपी शर्मा ओली ओ बहालवाला मन्त्रीहुक्रनहे थरुहट क्षेत्रमे प्रवेश निषेध कैनाके साथे सामाजिक बहिष्कार समेत कैना मोर्चाके संयोजक थारु चेतावनी डेहल रहिट ।
मोर्चासे आपन पाछेक संघर्षके कार्यक्रम अन्तर्गत साउन २५ गते प्रदेश सरकारहे ज्ञापनपत्र बुझाइल रहे । भदौ २ गते मानवअधिकार तथा नागरिक अगुवासँग धनगढीमे बृहत् अन्तक्रिया कैना जनैले रहे । टीकापुर घटना हुइल भदौ ७ गतेक दिनहे टीकापुर थरुहट विद्रोह दिनके रुपमे स्मरण करटी देशव्यापी रुपमा विरोधसभा कैना जनैले रहे । ओस्टके भदौ ८ गतेके दिनहे टीकापुरमे रहल थारुहुक्रनके घर, पसल, व्यावसायिक केन्द्र, सञ्चार गृहमे हुइल आगजनी, तोडफोड, लुटपात हुइल घटनाहे स्मरण करटी करिया दिनके रुपमे मनैना जनैले रहे ।
संविधान जारीके असोज ३ गतेके दिन थरुहट मोर्चासे संविधानमे विभेदकारी व्यवस्था उल्लेख करल कहटी ओइसीन व्यवस्था उल्लेखित धारा जरैना चेतावनी समेत डेहल रहे ।
थरुहट मोर्चासे १० जोड १ प्रदेश सहितके पहिचान सहितके संघीयता हुइ पर्ना माग रख्टी आइल बा । २०७२ भदौ ७ गते थरुहट आन्दोेलनकारी ओ प्रहरीबीच टीकापुरमे दोहोरो झडप होके टीकापुर घटना घटल हो । घटनामे १ नाबालकसहित ८ जनहनके ज्यान गैल रहे ।
