रानाथारु समुदायके युवायुवतीहुकन पत्रकारिता तालिम
सांसद राना कहलै, ‘राजनीति ओ समुदायहे जोर्ना बलगर माध्यम नै सञ्चारमाध्यम हो’
धनगढी, १० भदौ । आदिवासी जनजातिमे हाले सुचिकृत हुइल रानाथारु समुुदायके युवायुवतीहुकन पत्रकारिता तालिम डेगिल बा ।
आमसञ्चार माध्यममे पहुँच अभिबृद्धिके लाग आँगनबारी मिडिया प्रालि धनगढीसे सञ्चालित रानाथारु डटकमको आयोजनामे तालिम डेगिल हो । भर्चुअल माध्यमसे सञ्चालित उ तालिम ७ दिनसम सञ्चालन हुइल रहे ।
बुधके रोज उसरल उ तालिमके बरका पहुना रहल प्रतिनिधी सभा सदस्य नारदमुनि राना राजनीति ओ समुदायहे जोर्नामे सशक्त माध्यम सञ्चार क्षेत्र रहल बटाइल रहिट । उहाँ सञ्चार माध्यमसे जन्ताहुकनसम सहि सुचना डेहेक पर्ना बटैटी कहलै, ‘राज्यमे दुई मेरके अन्दोलन हुइठ, पहिल पहिचान ओ दोसर अधिकारके लाग । यी दुई विना मनैनके अस्तित्व नैहो ।’
उहाँ रानाथारु समुदाय आपन पहिचान पाइल ओ भाषा फेन सुचिकृत कराइलओरसे आब थप अधिकारके लाग सक्कुु जाने एक जुट होके आघे बह्रेक पर्नामे जोड डेहल रहै ।
कार्यक्रमके खास पहुना रहल नेपाल रानाथारु समाजके केन्द्रिय अध्यक्ष कृपाराम राना अप्नेहुकनके माग ओ मुद्दाहे उजार करेक लाग पत्रकार भैया बहिनियाहुक्रे एक जुट होके लागेक पर्ना औल्याइलै ।
कार्यक्रमके प्रशिक्षक समेत रहल गोरखापत्र दैनिकके उपसम्पादक लक्की चौधरी सहभागिहुकनके जिज्ञासाके जवाफ डेटी अप्नेहुुकन ठन बहुट अबसर ओ चुनौती रहलओरसे आपन कमलहे टिस्लोर बनाइक पर्ना सुझाव डेलै ।
बेलौरी नगरपालिका वडा नं. ८ के वडा अध्यक्ष नन्दकुमार राना पत्रकारहुक्रे सही ओ तथ्यमे रहिके समाचार सम्प्रेषण करेक पर्ना बटैलै ।
नेपाल रानाथारु समाजके केन्द्रिय उपाध्यक्ष कमल सिंह राना कार्यक्रममे स्वागत करटी आँगनबारी मिडिया प्रालिहे धन्यवाद डेटी तालिम ऐतिहासिक रहल दाबी कर्लै ।
७ दिने तालिममे रविन पातली रेडियो पत्रकारिता ओ स्टेज प्रोग्रामबारे प्रशिक्षण डेहल रहिट । गोरखापत्र दैनिकके उपसम्पादक लक्की चौधरी छापा पत्रकारिता तथा समाचार लेखनबारे प्रशिक्षण डेहल जनागिल बा ।
ओस्टके नेपालमे आदिवासी जनजाति, जनजाति भिट्टरके समग्र थारु समुदाय तथा रानाथारुके सञ्चारमाध्यममे पहुँच तथा अवस्था ओ अइना दिनमे उठान करेक पर्ना सम्भावित मुद्धावारे पहुरा थारु दैनिक (अनलाइन संस्करण) सम्पादक लखन चौधरी प्रशिक्षण डेहल रहिट ।
कैलाली ओ कञ्चनपुर जिल्लाके ४० से जहनके सहभागिता रहल तालिम समापन कार्यक्रम आँगनबारी मिडिया प्रालिके अध्यक्ष नन्दलाल रानाके घरगोसियाईमे उसरल रहे ।
