कैलाली प्रहरीके भूमिका शंकास्पद: पत्रकार पिटुइयाहे संरक्षण प्रहरीसे हुइटा ?
पहुरा समाचारदाता
धनगढी, २९ भदौ । पछिल्का समय कैलाली प्रहरी विवादके घेरामे फसल बा । चारुओरसे आलोचना हुइटी रहल बा ।
जिल्ला प्रहरी कार्यालय कैलालीके थुनुवा कक्षमे थुनुवाके ज्यान जैना मने सत्यतथ्य बाहिर नैअइना । डोसरओहोर, ओहे घटनामे धनगढीस्थित सञ्चार गृहमे संघातिक आक्रमण तथा पत्रकाहुकन उप्पर कुटपिट हुइल ४ दिन बित्लेसे फेन सामेल हुइल मनैनहे पक्रे नैसेकलकारण प्रहरीके भूमिका उप्पर प्रश्न चिन्ह उठल बा ।
गैल शुक्रके रोज धनगढी उपमहानगरपालिका १ के १९ वर्षीय रोशन विक जिल्ला प्रहरी कार्यालय कैलालीके थुनुवा कक्षस्थित शौचालयमे गाँर झुलल अवस्थामे फेला पर्लै । चोरी आरोपमे भदौ २२ गते पक्राउ परल उहाँ ओइसिन अवस्थामे फेला परल हुइट । मने उहााके आफन्तहुक्रे उहाँके ज्यान आत्महत्यासे नैहोके हत्या हुइल कहटी विरोधमे उत्रलै । मने अभिनसम प्रहरी सत्यतथ्य बात बाहिर नानेनैसेकल हो । जेकर छानविनके लाग प्रदेश प्रहरी कार्यालय धनगढीके प्रहरी उपरिक्षक राजिव बस्नेतके संयोजकत्वमे समिति गठन कर्ले बा । मने उ टोली अभिनसम छानविन प्रतिवेदन नानेनैसेकल जिल्ला प्रहरी कार्यालय कैलाली जनैले बा ।
ओहे घटनाहे लेके मृतकके आफन्त सहितके मनै गैल शुकके रोज धनगढीस्थित दिनेश सञ्चार गृह उप्पर संघातिक आक्रमण कर्नाके साथे कार्यरत पत्रकारहुकन कुटपिट समेत कर्लै । दिनेश सञ्चार गृह अन्तरगतके दिनेश खबर प्रहरीहे उदृत करटी विकसे आत्माहत्या करल कहटी समाचार सम्प्रेषण करल रहे । मने आत्महत्या नैहोके हत्या हो कहटी १५÷२० जाने दिनेश सञ्चार गृहमे पेलके संघातिक आक्रमण करटी कार्यरत पत्रकारहुकन कुटपिट करल रहिट ।
मने घटना घटल ४ दिन बित्लेसे फेन प्रहरी संलग्न मनैन्हे पक्राउ करे नैसेक्ले हो । जिल्ला प्रहरी कार्यालय कैलालीके प्रहरी प्रमुख तथा प्रहरी उपरिक्षक अनुप समशेर जवरा संलग्नहुकनके खोजीकार्य जारी रहल बटैलै । मने पक्राउ करे नैसेकलपाछे कैलाली प्रहरी आलोचित बनल हो ।
यहेबीबीच यहाँके पत्रकारहुक्रे आपन आन्दोलनहे सशक्त बनैले बाटै । नेपाल पत्रकार महासंघ कैलालीके नेतृत्वमे आन्दोलरत पत्रकारहुुक्रे धनगढीमे प्रदर्शन कर्नाके साथे सोम्मारके रोज जिल्ला प्रशासन कार्यालय आघे धर्ना समेत डेले बाटै ।
ब्रोड कास्टिड्ढ एसोसिएसन अफ नेपाल (बान) के केन्द्रीय उपमहासचिव गोविन्द रोस्यरा प्रहरीके घन उपस्थिति रहल धनगढी बजार, उ फेन आक्रमणकारी आक्रमण करेबर फेसबुक लाइफ कर्लेसे फेन ४ दिन बित्लेसे फेन पक्राउ करे नैसेक्ना दुःखद रहल बटैलै ।
नेपाल पत्रकार महासंघ सुदूरपश्चिम प्रदेश समितिके महासचिव .योगेश रावल सञ्चार गृहभित्रे पत्रकारहुक्रे दिनदुपहरे पिटुवा पैना ओ ओइनके विरुद्ध किटानी जाहेरी डेलेसे फेन पक्रे नैसेक्ना कलेक प्रहरी प्रशासनके निकम्मापन रहल बटैलै । जनताहुकन सूसुचित करैना पत्रकारहुक्रे पीडित बनलपाछे आमजनता कसिक न्याय पैना कहटी महासचिव रावलके आशंका रहे ।
यहेबीच नेपाल पत्रकार महासंघ कैलाली अध्यक्ष जगत साउँद प्रहरी प्रशासस अप्नही आक्रमणकारीहुकनहे संरक्षण टे नाई डेहटा ? कहटी आशंका कर्लै । आक्रमणमे संलग्नहुकनहे पक्राउ नैकरटसम आन्दोलनहे सशक्त बनैटी जैना अध्यक्ष साउँद चेतावनी समेत डेलै ।
मुख्यमन्त्रीहे ध्यानाकर्षण
यहेबीच यहाँके पत्रकारहुक्रे सुदूरपश्चिम प्रदेशके मुख्यमन्त्री त्रिलोचन भट्टहे ध्यानाकषर्ण पत्र बुझैले बाटै । ध्यानाकर्षण पत्र बुझ्टी मुख्यमन्त्री भट्ट घटनामे संलग्न रहल मनैनहे कारवाही हुइना बटैलै ।
उहाँ संचारगृह ओ पत्रकारउप्पर आक्रमण करुइयाहे कारबाहीके लाग प्रदेश सरकार फेन पहल कदमी लेहल दाबी कर्लै । ’धनगढीस्थित दिनेश एफएमके समाचार कक्षमे छिरके पत्रकारहुकन पिट्ना दुःखद हो, ’उहाँ कहलै, ’कानुनसे उप्पर कोइ फेन नाइ हो । अपराधीहे कानुनसे तोकल वमोजिम कार्यवाही हुइक परी ।’
