पत्रकारहुक्रनके सुरक्षाके लाग एकतावद्ध हुइनाके विकल्प नाइहो
पहुरा समाचारदाता
धनगढी, ३० भदौ । पत्रकारउपर कुटपिट करुइयाहे कारबाहीके माग करटी कैलालीके पत्रकार आन्दोलन जारी रख्ले बाटै ।
सोम्मारके जिल्ला प्रशासन कार्यालय कैलालीमे एक घन्टा धर्ना डेहल उहाँहुक्रे मंगरके रोज आन्तरिक मामिला तथा कानुन मन्त्रालयमे धर्ना डेहल रहिट । सञ्चार माध्यममे आक्रमण करुइयाहे प्रहरी आभिनसम पक्राउ नाइ करल विरोधमे नेपाल पत्रकार महासंघ कैलालीके अगुवाइमे पत्रकार आन्दोलनमे उत्रल हुइट ।
नेपाल पत्रकार महासंघ कैलालीके अध्यक्ष जगत साउद आक्रमण हुइल अँठ्वारे बिट्लेसे फेन समेत संलग्नहे पक्राउ नाइ करे सेकल कहटी दबाबके लाग आन्दोलनमे उत्रल बटैलै ।
‘प्रहरी प्रशासन मिडिया तथा पत्रकारहुक्रनहे आक्रमण करुइयाहे आभिन नाइ पक्रे सेकल हो,’ उहाँ कहलै, ‘दुई दिनभित्रे पक्राउ कैना प्रमुख जिल्ला अधिकारीसे आश्वासन डेहल मने हप्टा दिन हुइलेसे फेन दोषी पक्राउ नाइ परल हुइट । यदि आभिन सम प्रहरी प्रशासन दोषीहे पक्राउ कैके कारवाहीके दायरामे नाइ लानी कलेसे बाध्य होके प्रशासन आघे रिले अनसन फेन सुरु करब ।’
अध्यक्ष साउँद पत्रकारहुक्रनके भौतिक सुरक्षाके लाग एकतावद्ध होके आघे बह्रनाके औरे विकल्प नाइ रहल ओरसे सक्कु पत्रकारहुक्रनहे आग्रह करल रहिट ।
आन्दोलनमे उक्रल पत्रकारहुक्रे अँट्वारके धनगढीमे ¥याली निकर्नाके साथे जिल्ला प्रशासन आघे कोणसभा करल रहिट । ओस्टके सोम्मारके जिल्ला प्रशासनमे धर्ना डेहल रहिट । कलेसे सुदूरपश्चिम प्रदेशके मुख्यमन्त्री त्रिलोचन भट्टहे ध्यानाकार्षण पत्र फेन बुझागिल रहे ।
समाचारके विषयहे लेके गत शुकके धनगढीके दिनेश सञ्चारगृहमे प्रवेश कैके एक समूह समाचार कक्षमे पत्रकारहे मारपिट कैनाके साथे कर्मचारीउपर हातपात ओ दुर्व्यवहार करल रहे । भदौ २६ गते जिल्ला प्रहरी कार्यालयके हिरासतमे धनगढी उपमहानगरपालिका वडा नम्वर ५ के १९ वर्षीय एक युवक मृत भेटल रहिट ।
जिल्ला प्रहरी कार्यालयका प्रवक्ता प्रतिक विष्टसे डेहल जानकारीके आधारमे सञ्चारगृह अन्तर्गत दिनेश खबर प्रहरी हिरासतमे युवक आत्महत्या करल समाचार प्रकाशन करल रहे ।
युवकके हत्या हुइल कहटी एक समूह आत्महत्या करल कहिके काहे समाचार प्रकाशन करलो कहिके समाचार कक्षमे दिनेश सञ्चारगृहके सहसम्पादक जनक विष्टहे मारपिट कैनाके साथे व्यवस्थापक अमिता कुँवर लगायतके कर्मचारीउपर हातपात ओ दुव्र्यवहार करल रहे ।
टीकापुरमे फेन धर्ना
यिहे बिच कैलालीके टीकापुरमे फेन धर्ना डेहल बा ।
दिनेश सञ्चार गृहउपर आक्रमण कैके पत्रकारउपरहे मारपिट करुइयाहे कारवाहीके माग करटी नेपाल पत्रकार महासंघ कैलालीके अगुवाईमे सुरु करल आन्दोलन अन्तरगत ईलाका प्रशासन कार्यालय टीकापुरमे समेत धर्ना डेहल हो ।
नेपाल पत्रकार महासंघ कैलालीके उपाध्यक्ष दुर्गा देवकोटाके नेतृत्वमे टीकापुरमे ईलाका प्रशासन कार्यालय आघे आधा घण्टा धर्ना डेहल हुइट ।
धर्ना पाछे आयोजित सभाहे सम्बोधन करटी नेपाल पत्रकार महासंघ सुदुरपश्चिमके उपाध्यक्ष दुर्गाप्रसाद भण्डारी समाचारके विषयहे लेके सञ्चार गृह ओ पत्रकारउपर आक्रमण हुइना निन्दनीय ओ खेदजनक रहल बटैलै ।
‘कोरोना कहरमे आपन पेशागत दायित्व पूरा करटी रहल पत्रकारहे कानूनके धज्जी उरैटी आक्रमण करुइया जो कुहीहे फेन छुट डेहे नाइ मिली,’ भण्डारी कहलै, ‘पत्रकार जोगैना सबके दायित्व हो । आम नागरिकहे सुसुचित करुइया पत्रकारउपर आक्रमण करुइयाहे पक्राउ नाइ करलेसे हम्रे चुप लागके नाइ बैठब ।’
पत्रकार महासंघके केन्द्रीय पार्षद गणेश चौधरी पत्रकारउपर आक्रमण कैना लोकतन्त्र उपरके प्रहार हुइल बटैलै । प्रेस स्वतन्त्रता रहलेसे किल लोकतन्त्र रहना कहटी पत्रकारउपर हुइना आक्रमणसे लोकतन्त्रउपर प्रश्न चिन्ह खडा करल बटैलै । केन्द्रीय पार्षद मातृका तिमिल्सेना पत्रकार कानूनी दायरामे रहिके आपन दायित्व पुरा करटी रहल बेला हुइल आक्रमणके भत्सर्ना करलै । उहाँ प्रहरी प्रशासनसे आक्रमणमे संलग्नहे पक्राउ ढिलाई करलप्रति आपत्ति जनैले बाटै ।
दबाबमुलक कार्यक्रमके नेतृत्व करटी रहल पत्रकार महासंघ कैलालीके उपाध्यक्ष दुर्गा देवकोटा सञ्चार गृहमे आक्रमण कैके मारपिटसे पत्रकारके पेशागत ओ भौतिक सुरक्षाके विषयमे चिन्तित बनाइल बटैली ।
पत्रकारहे भौतिक सुरक्षाके प्रत्याभुती डेटी दोषीहे कानूनी कारवाहीके दायरामे लाने पर्ना देवकोटा करली ।
आक्रमण करुइया एक पक्राउ
दिनेश सञ्चार गृहमे आक्रमण कैके पत्रकारहे मारपिट करल एक जनहनहे प्रहरी पक्राउ करले बा ।
जिल्ला प्रहरी कार्यालय कैलालीके टोली धनगढी उपमहानगरपालिका वडा नम्बर ५ जाईसे मारपिटमे संलग्न सरोज थापाहे पक्राउ करल जनैले बा । जिल्ला प्रहरी कार्यालयके प्रवक्ता प्रहरी नायब उपरिक्षक प्रतिक विष्ट थापाहे जाई स्थित घरसे पक्राउ करल जानकारी डेलै ।
आक्रमण ओ मारपिटमे संलग्न अन्यके खोजी हुइटी रहल प्रहरी जनैले बा ।
