उपमहानगरपालिकासे ३२ सय ६१ जानेक स्वाव संकलन
पहुरा समाचारदाता
धनगढी, ३० भदौ । धनगढी उपमहानगरपालिकासे पिसिआर परीक्षणके लाग अभिनसम ३२ सय ६१ जानेक स्वाव संकलन करले बा ।
मंगरके रोज ठप १ सय १ जानेक स्वाव संकलन करल उपमहानगरपालिकाके प्रमुख नृपबहादुर वड बटैलै । नगर क्षेत्रमे ट्राभल हिस्ट्री नइरहल व्यक्तिमे कोरोना संक्रमण विल्गाइलपाछे पिसिआर परीक्षणके दायरा बढाइल उहाँ बटैलै ।
समुदायमे दुई सातासे कन्ट्रयाक्ट ट्रेसिङके आधारमे स्वाव संकलन कैना ओ परीक्षण कैना काम हुइटी रहल धनगढी उपमहानगरपालिकाके प्रमुख वड बटैलै । उहाँ कहलै, यकर साथे समस्या विल्गाइल व्यक्तिफे स्वाव लेना काम हुइटी रहल बा ।
निर्माण व्यवसायी संघ कैलालीके समन्वयमे धनगढी उपमहानगरपालिकासे स्वाव संकलन करले बा ।
मंगरसम ३ हजार २ सय ६१ जानेक पिसिआर परीक्षण करल धनगढी उपमहानगरपालिका स्वास्थ्य शाखा प्रमुख डाक्टर खगेन्द्र बम बटैलै । उहाँ कहलै, जेम्नेसे ४ सय ३६ जाने पोजेटिभ विल्गाइल बाटै । पोजेटिभ विल्गाइल मन्से सक्रिय केश २ सय ६१ बाटै ।
