जिल्ला प्रशासनसे स्थानीय तहगत सेवा डेना

पहुरा समाचारदाता
धनगढी,३० भदौ । जिल्ला प्रशासन कार्यालय कैलाली यिहे कुवाँर एक गतेसे दुसर सूचना नइनिकरटसम हप्तामे स्थानीय तहगत सेवा डेना जनैले बा ।

कोभिड–१९ के संक्रमण हुइ नइडेना स्वास्थ्य सुरक्षा सर्तकता तथा सामाजिक भैतिक दुरी कायम करटी सेवा प्रवाह करेक लाग हप्तामे स्थानीय तहगत सेवा सूचारु कैना मंगरके रोज एक विज्ञप्ती प्रकाशित करटी जानकारी डेहल हो । जिल्ला प्रशासन कार्यालय गैल भदौ २० गतेसे भदौ ३१ गतेसम नागरिकता राहदानी लगायत सक्कु सेवा स्थागित करले रहे ।

प्रशासकीय अधिकृत मिना जोशीके अनुसार नागरिकता सम्बन्धी कार्य गोदावरी नपाके स्थानीय अँटवार, बुधके दिन, कैलारी गाउँपालिकाके स्थानीय सोम्मार, विफेक दिन, धनगढी उपमहानगरपालिकाके स्थानीय मंगर शुकके दिन, चुरे गाउँपालिकाके स्थानीय सोम्मार ओ बुधके दिन सेवा लेहे पैना कहल बा ।

सम्बन्धित स्थानीय तहके सेवाग्राही सेवा लेहक लाग तोकल दिन मिलाके केल कार्यालयमे प्रवेश कैना विज्ञप्तीसमे कहल बा । कार्यालयके भिडभाड ओ कोभिड–१९ संक्रमणके अवस्था अनुसार उल्लेख तालिममे अवश्यकता अनुसार ठपघट ओ परिमार्जित कैटी लैजैना कहल बा । नेपाल सरकार तथा जनसंख्य मन्त्रालयसे जारी जनस्वास्थ्य मापदण्ड तथा गृह मन्त्रालयसे जारी सुरक्षा मापदण्ड कडाईके साथ पालना कैना ओ मास्क नइलगैना, जनस्वास्थ्य मापदण्डके उल्लंघन कैना व्यक्तिहे दण्डजरिवाना कैना हुइना प्रशासन जनैले बा ।