४ ठो टुव्वर लर्कनहे राहत
पहुरा समाचारदाता
धनगढी, २२ कुवाँर । वैदेशिक रोजगारीमे जाके ओहै मुवल कैलालीके धनगढी उपमहानगरपालिका–२२ गौरीकटानके ४६ बरसके गीताकुमारी पार्कीके ४ बच्चन्हे राहत वितरण करगिल बा ।
डाई बाबा डुनु जाने बिटलपाछे बेघर ओ सहाराविहिन हुइल बच्चनवारे पहुरा थारु दैनिकलगायतके सञ्चार माध्यममे समाचार आइलपाछे ह्यूमानिटी फाउन्डेसनके सदस्य एवं सञ्चारकर्मी दीपक उपाध्याय आपन छाइक् जलम दिनके अवसर पारके खाद्यन्न सहयोग करगिल हो ।
छाई सान्भी उपाध्यायके जलम दिनके अवसरमे घरहीमे पुगके ५० केजी चाउर, ५ केजी दाल, एक दर्जन लहैना साबुन, खैना तेल, विस्कुट, कोल्गेट, ब्रस, सेनेटरी प्याड लगायतके सामान सहयोग करल सञ्चारकर्मी उपाध्याय बटैलै । उहाँ डाई बाबा गुमाइल टुव्वर ओ बेघर रहल बच्चन्हे सहयोग करे पाइलमे खुसी ब्यक्त कर्लै ।
बैठ्ना घर फेन नैरहलपाछे उहाँहुकन धनगढी उपमहानगरपालिका वडा नम्बर ९ के वडा सदस्य शारदा ताम्राकार आपन घरमे एक कोठा निःशुल्क रुपमे उपलब्ध करैले बाटी ।
बैदेशिक रोजगारीके क्रममे कुवेतमे मुवल पार्कीके शव धनगढीमे कुवाँर १२ गते पुगागिल रहे । पार्की ७ बरस आघे कुवेत जाँइबर उहाँके छोट्की छाई नौ महिनाके रही । एकठो छावा ६ बरसके ओ डोसर छावा ८ बरसके रहिट । तीनु बच्चनहे १० बरसके छाई सुशीलाके जिम्मा लगाके उहाँ विदेश गैल रही ।
एक बरससम बाबाक् साथ रहे । मने, उहाँ ओराइलपाछे सुशीला तीनु भैया ओ बहिनियाहुकन अप्नही सेहरटी आइल बाटी ।
सम्बन्धित समाचार
‘वैदेशिक रोजगारीमे गैल डाई लकडाउनमे फसके बिट्ली’ : चार लर्कनके महाविजोग
