थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ अगहन २६४६, मंगर ]
[ वि.सं १३ मंसिर २०७९, मंगलवार ]
[ 29 Nov 2022, Tuesday ]

घरधनीसे संरचना भस्काके सडक विस्तारमे सहयोग

पहुरा | १९ कार्तिक २०७७, बुधबार
घरधनीसे संरचना भस्काके सडक विस्तारमे सहयोग

पहुरा समाचारदाता
धनगढी, १९ कार्तिक ।
क्षेत्रीय शहरी विकास आयोजना अन्तरके सडक विस्तारके लाग धनगढीके घरधनी सडक क्षेत्राधिकार भिटर पर्ना संरचना भस्काई लागल बाटै ।

नगरके सडक चाकिर बनाइक लाग घरधनी सडक क्षेत्राधिकार भिटर पर्ना पर्खाल, घर, टहरा भस्काई लागल हुइट । बुधके केल धनगढी उपमहानगरपालिका वडा नम्बर २ के ९ जाने घरधनी ओ वडा नम्बर ५ के ४ जाने घरधनी संरचना भत्कैना सुरु करल हुइट । वडा नं २ मे निर्माण हुइटी रहल गुल्म–चर्च सडक १० मिटर चाकिर बन्टी बा कलेसे वडा नम्बर ५ हुके निर्माण कैना क्याम्पस रोड–चटकपुर सडक १६ मिटर चाकिर बन्टी बा । घरधनी संरचना भस्काईबेर नगर प्रमुख नृपबहादुर वड, उपप्रमुख सुशीला मिश्र भट्ट, उपमहानगरके डिभिजनल ईन्जिनियर स्वयं उपस्थित हुके सडकक्षेत्र छुट्टइना काममे सहयोग करल रहिट ।

घरधनी अपनही घन, सावल लेके संरचना भत्काई लागल नगरप्रमुख नृपबहादुर वड बटैलै । नगरवासी सडक विस्तारके लाग करल सहयोग क्षेत्रीय शहरी विकास आयोजना समयमे सम्पन्न हुइनामे ढुक्क बाटी, नगरप्रमुख वड कहलै, स्थानीयके सहयोग विना कौनोफे ठाउँक विकास करे नइसेक्जाई । उपमहानगरपालिका सडक क्षेत्राधिकारमे पर्ना संरचना भस्कैना घरधनीहे आदर्श नगरवासीके रुपमे सम्मान कैना,भस्काइल भागके नक्सापासमे कर छुट कैना, उहे भागमे रंगरोगन करेबेर सहयोग कैना निर्णय करल नगरप्रमुख वड बटैलै । धनगढी उपमहानगरपालिकाके उपप्रमुख सुशीला मिश्र भट्ट धनगढीके नगरवासी विकासके लाग हातेमालो करठै कना सन्देश डेहल बटैली । उहाँ कहली, ओस्टेक सहयोग हुइलेसे दुसरा चरणके सडक फे हाली निर्माण हुई ।

सडक विस्तारके लाग अपन क्याम्पसके कम्पाउन्ड अपनही भत्काके सहयोग करल सुदूरपश्चिम ऐकेडेमीके संचालन सुवास शाही नगरके विकासके लाग सहयोग पुगे कहिके अपनही संरचना भस्कैना सुरु करल बटैलै । ‘सडक नगरवासीके लाग बन्टी बा, शाही कहलै, ‘टबमारे सडक क्षेत्राधिकारमे संरचना पर्ना घरधनीहे सहयोग कैना मै अनुरोध करटु ।’ नगर समृद्ध हुइक लाग नगरवासीके सहयोग आवश्यक रहनाफे शाही बटैलै ।

धनगढी उपमहानगरपालिका वडा नम्बर ५ तारानगरके गम्भीरसिंह बम नगरके विकासमे कोई अवरोध करे नइहुइना घरधनी बम बटैलै । ‘क्षेत्रीय शहरी विकास आयोजना अन्तर्गतके यी सडक १६ मिटरके बन्टी बा बम कहलै, कम क्षेत्राधिकारमे मोर संरचना पर्ना हुइल ओरसे मै पक्की घर अपनही भस्कैना सुरु करले बाटु ।

क्षेत्रीय सहरी विकास आयोजना अन्तर्गत पहिल चरणमे ७ ठो सडक निर्माण हुइना करके २०७७ साल असार २८ गते सम्झौता हुइल उपमहानगरपालिकाके डिभिनल ईन्जिनियर डिजराज भट्ट बटैलै । उहाँ कहलै, जेम्ने गुल्म–चर्च रोड (२ हजार ७ मिटर), धनगढी मेन रोड, ट्राफिक चौराहासे कैलालीनाला (१ हजार ३ सय ८० मिटर), हुलाकी सडक–क्याम्पस रोड– जाखोरताल (७ सय मिटर), क्याम्पस रोड– चटकपुर (३ हजार ६ सय ५० मिटर), धनगढी–खुटीया स्याउले रोड (८ सय ७० मिटर), मालपोत रोड (४ सय ३० मिटर ओ हसनपुर रोड (१ हजार १ सय ५० मिटर) रहल बा ।

यि हुइट सडक विस्तारके लाग अपनही संरचना भस्कुइया आदर्श नगरवासी
क्षेत्रीय शहरी विकास आयोजना अन्तर्गतके सडक विस्तारके काम अआघे बढ्ना हुइलपाछे धनगढीमे बुधके केल एक दर्जन ढेर घरधनी संरचना भस्कैना सुरु करले बाटै । उपमहानगरपालिका सडक बिस्तारके लाग अपनही संरचना भस्कैना आदर्श नगरवासी यी हुइट ।

धनगढी उपमहानगरपालिका वडा नम्बर २ के सुवास शाही, जनकराज जोशी, सुरेशबहादुर सिंह, जिएम स्लाम, सुरेश पन्त, मानबहादुर चौधरी, किरण शाह, अर्जुजबहादुर स्वाँर ओ धनगढी उपमहानगरपालिका वडा नम्बर ५ के गम्भीरसिंह बम, जोगराम चौधरी, हरिदत्त भट्ट, बहादुरसिंह खत्री रहल बाटै ।

जनाअवजको टिप्पणीहरू