देशभर २ हजारसे ढिउरजे संक्रमणमुक्त
काठमाण्डौं, ४ कुँवार । पाछेक २४ घण्टामे १०९५ जनहनमे कोरोना भाइरस संक्रमण पुष्टि हुइल बा । स्वास्थ्य तथा जनसंख्या मन्त्रालयके अनुसार १० हजार ७८६ पीसीआर परीक्षणमे ९७५ जाने ओ ३०३१ एन्टिजेन परीक्षणमे १२० जाने सहित १०९५ जनहनमे संक्रमण पुष्टि हुइल हो ।
पाछेक २४ घण्टामे २९५७ जाने संक्रमणमुक्त हुइल बाटै । इ संख्या पाछेक २४ घण्टामे डेखल संक्रमितके संख्याके दोब्बरसे ढिउर हो । ओस्टके कोरोना संक्रमणके कारण ८ जनहनके मृत्यु हुइल बा ।
देशभर सक्रिय संक्रमितके संख्या २२ हजार ३२३ रहल बा । जौनमध्ये २० हजार ८९१ जाने होम आइसोलेसनमे ओ १४३२ जाने संस्थागत आइसोलेसनमे रहल बाटै । कोरोनाके बिरामीमध्ये ३७१ जाने आईसीयू ओ १०८ जाने भेन्टिलेटरमे उपचाररत् रहल बाटै ।
सोम्माारके थपलसंगे नेपालमे कोरोना संक्रमितके कुल संख्या ७ लाख ८५ हजार ५४१ पुगल बा । इ संगे नेपाल मृत्यु हुउइयाके संख्या ११ हजार ४८ पुगल बा कलेसे ७ लाख ५२ हजार १७० जाने संक्रमणमुक्त हुइल बाटै ।
ओस्टके १० बरस टरेक १५ बालबालिकामे कोरोना संक्रमण पुष्टि हुइल बा कलेसे ११ से २० बरस उमेर समूहके ७८ जाने कोरोना संक्रमित थपल बाटै ।
अस्टेक, सुदूरपश्चिम प्रदेशमे ५३ जनहमे कोरोना संक्रमण पुष्टि हुइल बा । सामाजिक विकास मन्त्रालय, स्वास्थ्य निर्देशनालय डोटीके अनुसार १६९ पीसीआर परिक्षणमे ३८ जाने ओ ८४६ एन्टिजेन विधिसे करल परिक्षणमे १५ जहनमे संक्रमण डेखाइल रहे । अस्टेक, सुदूरपश्चिम प्रदेशमे २ जहनमे मृत्यु हुइल बा । कोरोना संक्रमणसे बझाङके ५० वर्षके पुरुष ओ ४० वर्षके पुरुषके मृत्यु हुइल मन्त्रालय जनैले बा ।
सेती प्रयोगशालामे ३६ जहनमे कोरोना पुष्टि
धनगढीस्थित सेती प्रादेशिक अस्पतालमे करल परिक्षणमे थप ३६ जनहनमे कोरोना पुष्टि हुइल बा ।
प्रयोगशालामे पाछके २४ घण्टामे १६२ नमुना परिक्षण करेबर ३६ जनहनमे संक्रमण पुष्टि हुइल अस्पतालके सुचना अधिकारी दिलिप कुमार श्रेष्ठ जानकारी डेलै । ओस्टके पाछेक २४ घण्टामे ५ जाने कोरोना संक्रमित चोखाके अस्पतालसे डिस्चार्ज हुइल बाटै । हाल अस्पतालमे ९ जाने संक्रमित उपचाररत रहल बाटै ।
जौनमध्ये ४ जनहनके आइसीयूमे ओ २ जनहनके भेन्टिलेटरमे उपचार हुइटी रहल अस्पताल जनैले बा । ओस्टके अस्पतालमे उपचाररत थप २ जाने कोरोना संक्रमितके मृत्यु हुइल बा ।
दुई जाने कोरोना संक्रमितके मृत्यु
बाँकेके नेपालगञ्जस्थित भेरी अस्पतालमे उपचाररत दुई जाने कोरोना संक्रमितके मृत्यु हुइल बा ।
बाँकेके कोरोना फोकल पर्सन तेज ओलीकाअनुसार बाँके ओ दाङके करके दुई जाने कोरोना संक्रमितके उपचारके क्रममे मृत्यु हुइल हो । उहाँक अनुसार बाँकेके खजुरा गाउँपालिका–४ के ७५ वर्षीया महिलाके अँटवार रात ७ः२० बजे मृत्यु हुइल हो ।
स्वास्थ्यमे समस्या आइलपाछे उहाँ भदौ २८ गते अस्पतालमे भर्ना हुइल रहिट । अस्पतालमे भर्ना हुइल दुसर दिन उहाँक संक्रमण पुष्टि हुइल रहे ।
ओस्टेक दाङके तुलसीपुर उपमहानगरपालिका–७ के २ वर्षीय वृद्धके उपचारके क्रममे अँटवार रात ७ः३० बजे मृत्यु हुइल उहाँ बटैलै । उहाँक भदौ १ गते संक्रमण पुष्टि हुइल रहे ।
