नुक्लीपुर महोत्सवके तयारी अन्तिम चरणमे
पहुरा समाचारदाता
धनगढी, २२ पुस । कैलारीके गौरीगंगा नगरपालिका–१० मे हुइ जैटी रहल नुक्लिपुर महोत्सवके तयारी धमाधम हुइटी रहल बा । इहे पुस २५ से २९ गतेसम सञ्चालन हुइना महोत्सव तथा होमस्टे उद्घाटनके लाग धमाधम तयारी हुइटी रहल हो ।
‘भाषाकला संस्कृति, जैविक विविधता संरक्षण ओ पर्यापर्यटन प्रवर्द्धन करि’ कना मूल नारा सहित पहिलचो नुक्लिपुर महोत्सव २०७९ आयोजना करे जैटी रहल होमस्टे व्यवस्थापन समितिके अध्यक्ष भागीराम चौधरी बटैलै ।
होमस्टेके प्रचारप्रसार, मौलिक हस्ताकला प्रवर्द्धन कैना उद्देश्य सहित महोत्सवके आयोजना करे लागल अध्यक्ष चौधरीके कहाइ रहल बा ।
यहोर महोत्सव तथा होमस्टे उद्घाटनके लाग तयारी धमाधम हुइटी रहल समितिके सदस्य तथा मिडिया संयोजक दिनेश दहित जानकारी डेलै । महोस्टवके लाग स्टल निर्माणसे मञ्च व्यवस्थापन लगायत महोत्सवके तयारी अन्तिम चरणमे पुगल उहाँ जानकारी डेलै ।
महोत्सवमे रमाइलो मेला, थारु खानपानके सुविधा, हस्ताकला प्रदर्शनी तथा विक्री वितरण, खुला पुरुष फुटवल प्रतियोगिता, चर्चित थारु कलाकारनके फ्रस्तुती, थारु गुरुवाहुक्रनके शत्ति प्रदर्शन, डल्लफमे जंगल सफारीके कार्यक्रम रहल मिडिया संयोजक दहित जानकारी डेलै ।
२०७७ सालमे होमस्टे स्थापना लगट्टे कोरोना महामारी सुरु हुइलपाछे नुक्लिपुर सामुदायिक होमस्टेके विधिवत उद्घाटन हुइ नैसेकल हो । आयोजक महोत्सवसँगे होमस्टेके उद्घाटन कार्यक्रम फेन रख्ले बा । नुक्लिपुरमे हाल ६ घरमे होमस्टे संचालनके लाग तयारी करल बा ।
कैसिक पुगे सेकजाइ महोत्सव तथा होमस्टे गाउँ
गौरीगंगा नगरपालिका वडा नम्बर १० मे नुक्लिपुर गाउँ परठ् । इ गाउँके उत्तरओर उदासीपुर गाउँ, दक्षिणओर कैलारी गाउँपालिका वडा नम्बर ८ के भंगहा गाउँ, पूरुब ओर भगतपुर ओ सुन्दरपुर गाउँ परठ् कलेसे पश्छिउ ओर लक्ष्मी ओ सरस्वती सामुदायिक बन्वा परठ् ।
होमस्टे गाउँ तथा महोत्सवमे पुगलक लाग महेन्द्र राजमार्ग बढैपुर आर्मी व्यारेकसे ७ किलोमिटर दख्खिन ओ उदासीपुरके सरस्वती माध्यमिक विद्यालयसे १ किलोमिटर पश्छिउ बनुवा किनारमे अवस्थित रहल बा । ओस्टके हुलाकी सडक हसुलिया बजारसे १६ किलोमिटर उत्तर ओर इ गाउँ सुन्दर शान्त वातावरणमे अवस्थित रहल बा ।
