थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

सुर्खेतमे थारु माघ विशेष शुभकामना कार्यक्रम

पहुरा | २३ पुष २०७९, शनिबार
सुर्खेतमे थारु माघ विशेष शुभकामना कार्यक्रम

पहुरा समाचारदाता
सुर्खेत, २४ पुस ।
माघ टिहुवारके महान अवसरमे वीरेन्द्रनगरमे लखागिन थारु उत्थान मञ्च सुर्खेतके मूल आयोजना ओ राष्ट्रिय थारु कलाकार मञ्च सुर्खेतके सहआयोजनामे लौवा वर्षके रुपमे मनैना थारु समुदायके माघ मिलन तथा शुभकामना आदान प्रदान कार्यक्रम विविध सांस्कृृतिक नाचगान सहिट कैगिल बा ।

कार्यक्रममे माघ टिहुवारके महत्व एवम् मौलिकताके बारेमे लौवा पुस्ताहे पत्ता नइहुके संस्कृतिप्रति सद्भाव हेरैटी गैल ओरसे वीरेन्द्रनगर नगरपालिकाके वडा नं २ मे यी टिहुवारके महत्वके बारेमे एवम् मघौटा नाचसहित कार्यक्रम मनाइल लखागिन थारु उत्थान मञ्च सुर्खेतके अध्यक्ष मान बहादुर चौधरी ‘पन्ना’ बटैलै ।

माघ टिहुवारके महत्वके बारेमे मानविर थारुसे थारुहुकनके महान टिहुवार माघ मनैना विधि तौरतरिका, समुदायमे यकर महत्व ओ वर्तमान टमान संस्कृतिके प्रभावके चुनौेती ओ लौव पुस्तासे अपन संस्कृतिहे आत्मसात करे पर्ना लगायतके विषयमे विचार व्यक्त करलै ।

कार्यक्रमके वडका पहुना सुर्खेत वीरन्द्रनगर नगरपालिकाके वडा नं २ के वडाअध्यक्ष गजबहादुर बुढा थारुहुकनके ऐतिहासिक चाड माघमे सक्कु गाउँसे जम्मा हुके मनैना कामसे संस्कृति संरक्षणमे महत्वपूर्ण योगदान पुग्न बटैलै । यैसिन रचनात्मक कार्यक्रमसेफे थारु संस्कृति संरक्षणो टेवा पुग्न हुइल ओरसे यिहीहे आउर व्यापक ओ बृहत करटी जाई पर्ना बटैलै । संस्कृति देशके पहिचान ओ चिनारी हुइल ओरसे सक्कु जातजातिके संरक्षण कैना अपने सहयोग कैना प्रतिवद्धता जनैलै ।

कार्यक्रममे लालबहादुर थारुसे थारुहुकनके मौलिक संस्कृति पहिचान धरोहर माघ टिहुवार फे हो । यिहीहे बचैना जिम्मा सरकारसे दायित्व बोध करे पर्नामे वेवास्ता करेबेर संस्कृति धरापमे परटी रहल चिन्ता व्यक्त करलै ।

वीरेन्द्रनगर नगरपालिकाके वडा नं २ के वडासदस्य सरिता चौधरी सुर्खेतके थारुहुकनके भाषा संस्कृति संरक्षण संवद्र्धन कैना थारु समुदाय अभिनफे जागरुक हुई पर्नामे जोड डेलै । युवाहे पुराना पुर्खाहुक्रे सिखाई पर्ना ओ युवाहुक्रेफे अपन संस्कार संस्कृतिहे माया करटी जर्गेना करे पर्नामे जोड डेलै । युवाहुक्रे अवके बडल्टी परिवेशमे सांस्कृतिक रुपान्तरण कैना जरुरी हुइलेसेफे मौलिकताहे भुलाई नइहुइनामे जोड डेलै ।

कार्यक्रममे २ नं वडासदस्य रमेश चौधरी, कालुराम दहित, थारु वुद्धिजीवि अमर चौधरी, शेरबहादुर थारु, टिकाराम थारु, लगायतके वक्ताहुक्रे थारुहुकनके मौलिक पहिचान बचैना सक्कु जे साथ डेहे पर्नामे जोर डेहल रहिट ।
कार्यक्रममे टमान स्थानीय थारु कलाकारहुकनके थारु नृत्य तथा गीत समेत प्रस्तुत करल रहे । कार्यक्रम लखागिन थारु उत्थान मञ्चके अध्यक्ष मानबहादुर पन्नाके अध्यक्षतामे सम्पन्न हुइल रहे । कार्यक्रमके सञ्चालन लखागिन थारु उत्थान मञ्च सुर्खेतके सचिव जीतबहादुर चौधरी करले रहिट ।

जनाअवजको टिप्पणीहरू