प्रगतिके डगरमे नमस्ते सहकारी

डेढ लाखसे सुरु करल सहकारीके सम्पति ४३ करोड ९० लाखसे ढेर पुगल

पहुरा समाचारदाता
धनगढी, २६ पुस । कैलाली जिल्लाके धनगढी उपमहानगरपालिका–८ मे १४ बरस पहिले स्थापना हुइल नमस्ते बचत तथा ऋण सहकारी संस्था लिमिटेड प्रगतिके डगरमे लम्कल बा ।

२०६५ सालमे ढेड लाख शेयर पुँजी ओ २५ जाने शेयर सदस्यसे सुरुवाट करल यी सहकारीके २०७८÷७९ के वासलतमे हेरेबेर संस्थाके कुल सम्पति अब्बे ४३ करोड ९० लाख २६ हजार २९८ रुप्या पुगल संस्थाके प्रवन्धक विजय चौधरी बटैलै ।
यी संस्थाके शेयर सदस्य संख्या अब्बे ६ हजार ८४ जाने पुगल बटै । जेम्ने महिला ३२ सय ५३ ओ पुरुष २८ सय ३१ जाने बटै । ओम्नेसेफे लघुवित्त कार्यक्रममे १५ सय ८४ जाने जुरल उहाँ बटैलै । धनगढी उपमहानगरपालिका–८ स्थित प्रधान कार्यालयसे यहाँके १९ वडामे सेवा प्रदान हुइटी रहल बा,’ प्रवन्धक कहलै, ‘आब कार्यक्षेत्र विस्तारके प्रक्रियामे आघे बह्रल बटी ।’
संस्थाके शेयर पुँजी ३ करोड ५५ लाख २८ हजार ७ सय, जगेडा कोष ३ करोड ७९ लाख ७८ हजार ५४३ रुप्या, बचत कोष हिसावमे २० करोड ५ लाख २० हजार २१९ रुप्या रहल उहाँ जनैलै ।

सहकारीके बाहय ऋण लगानी १३ करोड ७३ लाख ७८ हजार ७७१ रुप्या, लगानीमे रहल ३५ करोड ५५ लाख २ हजार ३०१ रुप्या, अन्य जिल्ला सहकारी बैंक, जिल्ला बचत संघ, सुदूरपश्चिम उपभोक्ता सहकारी संघलगायतसे शेयर किनलके १५ लाख २२ हजार ५ सय लगानी करल प्रवन्धक बटैलै ।

स्थिर सम्पत्तिमे जग्गा घर, भवन, कार्यालय, फर्निचर, साधान परिवाहनमे ३ करोड ५० लाख ९८ हजार ८०१ रुप्या बराबर रहल उहाँ बटैलै । गैल बरसके नाफा नोक्सानके हिसाबसे हेरेबेर व्याज मन्से आम्दानी ५ करोड २४ लाख ६३ हजार ५११ रुप्या करल कैगिल बा । सेवा शुल्क तथा अन्य आम्दानी मन्से ४५ लाख ३१ हजार ७५५ रुप्या करल ओ जम्मा आम्दानी ५ करोड ६९ लाख ९५ हजार २६७ रुप्या कैना सफल हुइल उहाँ बटैलै ।

खर्च ओर व्याज खर्च ४ करोड ५९ लाख ३५ हजार ३३२ रुप्या खर्च हुइल बा । १ करोड १० लाख ५९ हजार ९३५ रुप्या नाफा कमाइल बटैलै । ओम्नेसे ७ लाख ५३ हजार २७९ रुप्या २८ पैसा कर तिरल उहाँ बटैलै । १ करोड ३ लाख ६ हजार ६५६ रुप्या रहल उहाँ बटैलै । गैल बरस संस्थाहे प्रविधि मैत्री बनैनाओर आघे बह्राइल रहे,’ उहाँ कहलै,‘ अब्बे प्रविधि मैत्री बनाईबेर ८ सयसे ढेर जनहनहे मोवाइल बैकिङ सेवा प्रदान कैगिल बा । क्यूआर कोड सेवा एक सयसे ढेर जनहनहे प्रदान हुइल बा । संस्थाके अपन जग्गा होके अपन घर बा । ११ सदस्यीय संचालक समिति १९ जाने कर्मचारी रहल बटै ।

पाँच स्थानीय तहे कार्यक्षेत्र विस्तारके तयारीमे

नमस्ते बचत तथा ऋण सहकारी संस्था लिमिटेडके अध्यक्ष जगतराम चौधरी अब्बे बहुट हाली कार्य क्षेत्र विस्तार करटी पाँच ठो गाउँपालिका ओ एक ठो नगरपालिकामे सेवा आघे बह्रैना तयारीमे जुटल बटैले बटै ।

आर्थिक समृद्धिके लाग स्थापना हुइल यी सहकारीके कार्यक्षेत्र विस्तार करे जाइटी,’ उहाँ कहलै, ‘उ अभियानमे एक घर, एक शेयर सदस्य समेटना कोशिशमे बाटी यी यम्ने सक्कु जानेक साथ सहयोग आवश्यक बा ।’ एक घर, एक सदस्य अभियान अन्र्तगत धनगढी उपमहानगरपालिकामे छुटलहे समावेश करटी ठप पाँच गाउँपालिका ओ एक नगरपालिकाहे समेटना अध्यक्ष बटैलै । नमस्ते सहकारी कहल आर्थिक क्रान्ति हो, आर्थिक क्रान्तिमे सफल हुइबी कलेसे अपन परिवारमे जन्नी या थारु मनै हुइलेसे दुई पैसा कमाके घर जोहो करे सेक्बी । ओहे हम्रे एक ठो सफलताके रुपमे चिन्हे जैबी । आर्थिक रुपमे सम्पन्नता हुइलेसे शिक्षा, स्वास्थ्य लगायत राजनिति रुपमेफे आघे बह्रे सेक्ना उहाँ बटैलै ।

संस्थाके पूर्व कार्यकारी प्रमुख कुन्नु नारायण चौधरीफे २५ जाने शेयर सदस्यसे सुरु करल संस्था १४ बरसके दौरानमे भारी प्रगति करल बटैलै । उहाँ कहलै, ‘सुरु–सुरुमे १०÷१० हजार रुप्या लगानी कैके कोन्टीसे सहकारीके कारोवार सुरु करली । शेयर सदस्यहुकनके सहयोगसे अब्बे विशाल भवन बनैना सफल हुइल बटी । करिब ४४ करोड रुप्याके कारोवार हुइटी रहल बा ।’

नमस्ते सहकरीके २०औं साधारण निम्जल

पहुरा समाचारदाता
धनगढी,२६ पुस । नमस्ते बचत ऋण सहकारी संस्था लिमिटेडके २०औं साधारणसभा सोम्मारके रोज निम्जल बा ।
सहकारी ऐन २०७४ तथा सहकारी नियमावली २०७५ ओ सहकारी संस्थाके विनियमके अधिनमे रहिके स्वीकृत कार्यक्षेत्रहे पाँच भागमे विभाजन करके यी सहकारीसे २०औं साधारणसभा इकाई तह अन्र्तगत गैल पुस १९ गतेसे धनगढी उपमहानगरपालिका–१५ कनरीसे कार्यक्रम सुरुवाट करल रहे ।

ओस्टेक करके पुस २० गते धनगढीके थारु छात्रवासमे, पुस २१ गते तारानगरके देउथानमे, पुस २२ गते धनगढी उपमहानगरपालिका–२ पिपल चौतरा बैयावेहडीमे, पुस २३ गते धनगढी उपमहानगरपालिका–१० जुगेडास्थित जनकल्याण माविमे ओ समापन कार्यक्रम फेरसे सोम्मारके रोज धनगढी–७ थारु छात्रबासमे करल हो ।

समापन कार्यक्रमके वडका पहुना धनगढी उपमहानगरपालिकाके वडका पहुना गोपाल हमाल रहिट । कार्यक्रममे उहाँ नमस्ते सहकारी संस्थासे आर्थिक समृद्धिके टेवा पुगाइल बटैलै । उहाँ कहलै, ‘थारु समुदायके बौद्धिक व्यक्तित्व यी सहकारीमे जोरल बटै । निम्न आय रहल व्यक्ति यी सहकारीके माध्यमसे कारोवार सुरु करेबेर आर्थिक स्तरमे बृद्धि हुइल बा ।’

थारु समुदाय अब्बे ढेर क्षेत्रमे जोरल बटै,’उहाँ कहलै, ‘पहिले घर बनाइक लाग भारतसे मिस्त्री नाने परे, अब्बे थारु समुदायके व्यक्ति बनैठै । ओटरे केल नाही टेक्निकल क्षेत्रमेफे थारु समुदायके व्यक्तिके ढेर उपस्थिति हुइल विल्गठ ।’ छोट–छोट लगानी करके भारी आम्दानी करे सेक्ना ओरसे सहकारीमे जोरना जरुरी रहलफे नगर प्रमुख हमाल बटैलै ।

वडा नम्बर ८ के वडा अध्यक्ष जुगराम चौधरी नमस्ते सहकारीके माध्यमसे व्यापार, व्यवसाय कैना सहजुल हुइल उहाँ बटैलै । अपने वडामे रहल यी सहकारीसे सहकार्य करटी आघे बह्रनाफे उहाँ बटैलै ।

राष्ट्रिय सहकारी बैंकके प्रवन्धक कृष्णबहादुर रावल नमस्ते सहकारी आघेक प्रदेशमे उत्कृष्ट कारोवार कैना सहकारीके रुपमे पुरस्कृत हुइल बाट सम्झैलै । उहाँ कहलै, ‘सुदूरपश्चिम सयौं सहकारी बा । उ पुरस्कार बल्य सहकारी पैठै मने नमस्ते सहकारी मजा करटी गैल ओरसे उ पुरस्कार पाइल हो ।’

थारु कल्याणकारिणी सभा कैलालीके कार्यवाहक अध्यक्ष माधव चौधरी नमस्ते सहकारी थारु समुदायके पहिचान बनल बटैलै । नवजीवन सहकारीके सदस्य शिवराज फुलारा नमस्ते सहकारी व्यवस्थित हुइटी बटैलै । उहाँ कहलै, ‘मै बहुट सहकारीके साधारणसभा सहभागी हुुइनु मने यी सहकारी बराबर व्यवस्थित कहु नइडेख्नु ।’

नमस्ते बचत ऋण सहकारी संस्था लिमिटेडके पूर्व कार्यकारी प्रमुख कुन्नु नारायण चौधरी २०६५ सालके डेढ करोड शेयर पुँजी ओ २५ जाने शेयर सदस्यसे सुरुवाट सहकारी अब्बे अपने जग्गामे भवन बनाके भारी करोबार कैना सफल हुइल बटैलै । उहाँ कहलै, यी सहकारीके कामकाज सुरु सुरुमे एक कोन्टीसे सुरुवाट करली, अब्बे विशाल भवन बा । यहाँसम पुगैना शेयर सदस्यहुकनके भारी हात बा ।

बैंकसे अब्बे लोन निकर्ना बहुट झन्झट बा, मने सहकारी स्थापना पाछे बहुट सहजुल हुइल उहाँ कहलै ।
कार्यक्रममे संस्थाके प्रवन्धक विजय चौधरी आर्थिक बर्ष २०७८÷०७९ सालके प्रगति तथा सहकारीबारे जानकारी डेहल रहिट ।
कार्यक्रममे संस्थाके उपाध्यक्ष रोहितकुमार चौधरी आर्थिक समृद्धिके लाग सहकारीके स्थापना हुइल बटेलै । उहाँ कहलै, ‘आर्थिकसंगसंगे सांस्कृतिक पहिचान खोज्टी राजनितिक रुपमे आघे बह्रना जरुरी बा ।’ संस्थाके अध्यक्ष जगतराम चौधरीके अध्यक्षतामे हुइल समापन कार्यक्रमके संचालन सचिव खडकबहादुर चौधरी करले रहिट । २०औं साधारणसभाके समापन कार्यक्रममे संस्थाके संस्थापक, संचालक समितिके सदस्य, पूर्व कार्यकारी अध्यक्ष, पूर्व कर्मचारी, शेयर सदस्यहुकनके सहभागिता रहे ।

२०औ साधारणसभाके अवसरमे सम्मान कार्यक्रमम

नमस्ते बचत तथा ऋण सहकारी संस्था लिमिटेडसे उत्कृष्ट कार्य करल कर्मचारी, शेयर सदस्य, असल ऋणी ओ महिला केन्द्रहुकनहे सम्मान करले बा । २०औं साधारणसभामे उत्कृष्ट कर्मचारीमे सृष्टि चौधरी, कैलाशपति डगौराथारु, असल बचतकर्ता आशाकुमारी चौधरी ओ असल ऋणी सुदर्शन चौधरीहे प्रशंसापत्र सहिट सम्मान कैगिल बा ।

सहकारीसे असल महिला केन्द्रके रुपमे शुभकामना महिला केन्द्र, राना महिला केन्द्र, त्रिशक्ती महिला केन्द्र, जुनेली महिला केन्द्र, पशुपति महिला केन्द्र, बैयावेहडी महिला केन्द्र, विपी महिला केन्द्र, नमूना महिला केन्द्र, हरियाली महिला केन्द्र, जुगेडा महिला, शिलशिला महिला केन्द्रहे बैठक बैठना चटाईसहित प्रशंसापत्र डेके सम्मान कैगिल बा । कलेसे थारु समुदायके मघौटा नाँचसहित स्वागत करल दिपज्योति महिला समुह तारानगरहे प्रशंसापत्रसहित सम्मान कगिल बा ।