नुक्लीपुर महोत्सवमे थारु हस्तकलाके प्रवद्र्धन
पहुरा समाचारदाता
धनगढी, २६ पुस । कैलालीके गौरीगंगा नगरपालिका–१० नुक्लीपुरमे यिहे पुस २५ गतेसे २९ गतेसम संचालनमे रहल महोत्सवमे लोप हुइटी रहल थारु हस्तकलाके सामाग्री विक्री ओ प्रवद्र्धनके लाग धारल बा ।
सामुदायिक होमस्टे गाउँ नुक्लीपुर महोत्सवमे स्थानीयहुकनके हाँठेलेके सिर्जाइल थारु हस्तकला फेन विक्री ओ प्रचारप्रसारके धारल महोत्सवके आर्थिक व्यवस्थापन संयोजक दिनेश दहित बटैलै ।
महोत्सवमे डिलिया, छिटुवा, छट्री, बेंर्री, खैंचा, साडा बिंर्रा, बुट्टाडार बिंर्रा सिरहट्टा सहित, साडा ढकिया, पनुवाडार ढकिया, डोना, टेपरा, ढर्हिया, डेलुवा धारल आयोजक जनैले बा ।
थारु समुदायके प्रत्येक घर यी हस्तकला सामाग्री रहना मने करिब अब्बे लोप हुइटी गैल ओरसे पुर्खनके सीपके बनाइक स्थानीय हस्तकला सामाग्री व्यवसायिक रुपमे प्रबद्र्धन करक अइसिन कलाके प्रदर्शनी कैनाके संगसंगे खरिद बिक्री फेन धारल महोत्सवके आर्थिक व्यवस्थापन संयोजक दहित बटैलै ।
सामुदायिक होमस्टे गाउँ नुक्लीपुर व्यवस्थापन समितिके समितिसे हस्तकला सामाग्रीके मोलफे तोक्ले बा । जेकर मोल डिलिया २००, छिटुवा ५००, छट्री १०००, बेंर्री १५०, खैंचा ३००, साडा बिंर्रा २००, बुट्टाडार बिंर्रा सिरहट्टा सहित ३००, साडा ढकिया १५००, पनुवाडार ढकिया २१००, डोना ५, टेपरा १०, ढर्हिया ३०००, डेलुवा ९००० मोल टोकल बा ।
–
–
