कैलारीके विकास निर्माण योजनाके अनुगमन

पहुरा समाचारदाता
हसुलिया, २६ पुस । कैलालीके कैलारी गाउँपालिकामे विकास निर्माण योजनाके गाउँपालिका स्तरीय अनुगमन समुहसे अनुगमन कैगिल बा ।

गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोलीसे मंगरके रोज टमान योजनाके स्थलगत अनुगमन करल हो । पालिकाके टमान वडामे सञ्चालित निर्माणाधीन योजनाके गुणस्तर रहल÷नइरहल बारेमे अनुगमन करल समिति संयोजक भगवतीकुमारी चौधरी बटैली ।

गाउँपालिका स्तरीय अनुगमन समुहसे कैलारी–६ स्थित सिमरना पारीके सम्पन्न हुइल झोलुङे पुलके अनुगमन हुइल बा । वडा नम्बर ७ भुइयाँफाटा स्थित नेपाल मानव धर्म हंसज्ञान सेवा समिति आश्रममे माटी पटानीके अनुगमन कैगिल बा । यहाँ माटी पटानीके काम ओराइल जनागिल बा ।

अनुगमन समितिसे वडा नम्बर ३ के जनता आधारभूत विद्यालयके भवन निर्माणके अनुगमन हुइल बा । यहाँ काम सम्पन्न हुइल योजना शाखाके प्रमुख सन्तोषकुमार चौधरी बटैलै । वडा नम्बर ६ स्थित सडक स्तरोन्नतीके अनुगमन कैगिल शाखा प्रमुख बटैलै । सडक स्तरोन्नती काम बेनौली गाउँ प्रतिक्षालयसे पुरान स्कूलसम हुइल बा ।

अनुगमन टोलीमे गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, समितिके सदस्य तथा वडा नम्बर ९ के अध्यक्ष खेमराज चौधरी, योजना शाखा प्रमुख सन्तोषकुमार चौधरी, सदस्य सुनिलादेवी चौधरी ओ प्राविधिक हिमाल कुश्मीलगागतके सहभागिता रहे ।