जेष्ठ नागरिकहे सम्मानके लाग कम्रा वितरण

पहुरा समाचारदाता
हसुलिया, २६ पुस । कैलालीके कैलारी गाउँपालिका वडा नम्बर ६ के कार्यालयसे जेष्ठ नागरिक तथा एकल महिलाहुकनहे कम्रा वितरण करले बा ।

मंगरके रोज गाउँपालिका उपाध्यक्ष भगवतीकुमारी चौधरीके वडका पहुनामे हुइल एक कार्यक्रमके विच वडा नम्बर ६ के जेष्ठ नागरिकहुकनके कम्रा वितरण करल हो । उ कार्यक्रममे सम्बोधन करटी उहाँ जेष्ठ नागरिकहुकनहे सम्मानके कम्रा वितरण करल बटैली ।

जुरार महिनामे सबसे ढेर प्रभावित जेष्ठ नागरिक ओ लर्का बच्चा हुइल ओरसे ओइनके ध्यान डेना आवश्यक रहल उहाँ बटैली । अब्बे पुस महिनाके जार बह्रल बा, लपारबाही करलेसे निमोनिया, श्वास प्रश्वास, दमके रोग डेखा पर्ना ओरसे शरिरहे डन्दुर बनैटी रहना उहाँ सुझाव डेली । ३४८ जाने जेष्ठ नागरिक ओ १०५ जाने एकल महिलाहुकनहे कम्रा वितरण करल हो ।

वडा अध्यक्ष प्रेमबहादुर चौधरीके अध्यक्षतामे हुइल कार्यक्रममे गाउँपालिकाके योजना शाखा प्रमुख सन्तोषकुमार चौधरी, वडा सुनिलादेवी चौधरी, महाविर चौधरी, गिता सुनार, फुलपाती चौधरी, प्राविधिक हिमाल कुश्मी, उपाध्यक्षके स्वकीय सचिव कृष्ण चौधरीलगायतके उपस्थिति रहे । कार्यक्रमके संचालन वडा सचिव अन्नत कँडेल करले रहिट ।