थारु गाउँमे लौवा भल्मन्सा छन्ना सुरु
पहुरा समाचारदाता
धनगढी, ५ माघ । थारु समुदायके लौवा बरस माघ टिहुवार अर्थात थारु सम्बत २६४६ सुरुवाट संग्गे लौवा नेतृत्व वडघर/भल्मन्सा/महटाँवा चयन कैना अभियान सुरुवाट हुइल बा ।
थारु समुदायमे एक बर्षे कार्यकालके लाग प्रत्येक बरस लोकतान्त्रिक पद्धतीसे लौवा नेतृत्व चयन करटी आइल हो । माघी डेवानी/भुर्रा खेलसे कैलाली जिल्लाके घोडाघोडी नगरपालिका वडा नम्बर १० लठैया गाउँके भल्मन्सामे सुनितादेवी चौधरी सर्वसम्मतसे चयन हुइल बटी । उहाँहे गाउँ भरिक किसान सर्वसम्मतसे भल्मन्सा बनाइल श्रवण चौधरी बटैलै ।
उहाँ कहलै, ‘हमार गाउँमे दुई बरसके लाग भल्मन्सामे छनौट कैजाइठ, आघेक भल्मन्साके दुई बरसे कार्यकाल पुुगलपाछे भुरा खेलसे लौवा भल्मन्साके रुपमे सुनितादेवी चौधरीहे सर्वसम्मतसे छनौट करली ।’
यिहीसे आघेफे इन्द्रादेवी चौधरी भल्मन्सा बन्के गाउँक नेतृत्व सम्हार रहिट । दुई बरसे कार्यकाल पुगलपाछे इन्द्रादेवी लौवा भल्मन्सा सुनिताहे जिम्मेवारी सौप्ले बटी । ओस्टेक गौरीगंगा नगरपालिका वडा नम्बर १० नुक्लीपुरमे यि बरस फेरसे पुराने भलमन्सा हिंगुराम चौधरीहे जिम्मेवारी सौपल दिनेश दहित बटैलै । थारु समुदायमे प्रत्येक बरस लोकतान्त्रिक विधि प्रक्रियासे लौव भल्मन्सा चयन करठी,’ उहाँ कहलै, ‘पुराने भल्मन्सा गाउँमे मजा काम करल ओरसे फेर हुकहिनहे गाउँक नेतृत्वके जिम्मेवारी डेहल हो ।’ हिंगुरामके यी बरस भल्मन्साके नेतृत्व लेहल टिसरा बरस हो ।
नुक्लिपुर गाउँके अघरियामे सुनेश चौधरी, भान्सेमे तहविलदास चौधरी, सोनु राम चौधरीहे सर्वसहमतिसे चयन हुईल बटै ।
ओस्टेक गोदावरी नगरपालिका–८ फकलपुर गाउँक खोज्नीबोज्नी/बखेरी/भुराखेल २०७९ से भल्मन्सा, ओरगान ओ भल्मन्सा सल्लाहकार समिती गठन कैगिल बा । खोज्नीबोज्नी/बखेरी/भुराखेलसे भल्मन्सामे टेकराज चौधरी ओ ओरगानमे गोपिलाल चौधरीहे चयन कैगिल बा । ओस्टेक करके भल्मन्सा सल्लाहकार संयोजकमे फुलाराम चौधरी, सदस्यमे मृत्तलाल चौधरी, भागीराम चौधरी, छवि लाल चौधरी, गणेशकुमार चौधरी ओ राजकुमारी चौधरी चयन हुइल बटै । ओस्टेक करके धनगढी उपमहानगरपालिका–३ मे मानबहादुर चौधरीहे भल्मन्सा चयन कैगिल बा ।
माघ थारु समुदायके लाग महत्वपूर्ण महिना रहल ओरसे महिनाभर लौव नेतृत्व छनौट कैना, बरसभर करल प्रगतीके समिक्षा कैना ओ लौव योजना बनाजैना करटी आइल धनगढी उपमहानगरपालिका नगर बडघर/भल्मन्सा समितिके अध्यक्ष रोहित चौधरी बटैलै ।
