थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

सरोज चौधरी लगातार २८ औं चो भलमन्सा बन्लैं

पहुरा | ५ माघ २०७९, बिहीबार
सरोज चौधरी लगातार २८ औं चो भलमन्सा बन्लैं

अनुमोदन समाचार
धनगढी, ५ माघ ।
कैलालीके धनगढी उपमहानगरपालिका वडा नम्बर ८ धनगढी गाँउक सरोज चौधरी अशौक सालफे भल्मन्सामे चयन हुइल बाटै । बिफेक रोज हुइल भुरा खेलसे उहाँहे फेनसे भलमन्सामे चयन करल हो । उहाँक यी बरस भल्मन्सा बन्ना २८ औं बार हो ।

धनगढी गाउँक पुरान थारु बस्ती समाज माघी डेवानीमार्फत हुकहिनहे अशौफे फुलमाला घलाके अगुवा चुन्लै । गाउँ समाजसे गाउँ प्रमुखके जिम्मेवारी पाइलपाछे गाउँके विकास निर्माण, आपसी मेलमिलाप तथा झै–झगडा मिलैना ओ और सरोकारवाला निकायहुकनसंग मजा समन्वय करल कहटी हुकहिनहे फेरसे भल्मन्साके जिम्मेवारी डेहल धनगढी गाउँ पुरान थारु बस्तीके सुर्य चौधरी बटैलै ।

सरोज चौधरी २०५२ सालसे लगटार भल्मन्सा खेलैटी आइल बाटै । ‘गाउँ समाजमे निस्वार्थ भावनाके साथ सेवा डेटी आइल बटु,’ नवनिर्मित भल्मन्सा सरोज कहलै–‘भल्मन्सा बन्के २७ बरससे बिन पारिश्रमिक सेवा डेगैल, अशौफे गाउँ समाज अगुवाके रुपमे चुन्लै ।’ उहाँ कहलै, मै टे २०५२ सालसे भल्मन्सा खेलाइटु मोर बाबा ओ बुदुक नइविटट्सम भल्मन्सा खेलैनै ।

सरोजके बाबा रामचन्द्र चौधरीफे निस्वार्थ, पारिश्रमिक बिना अपन जीवनभर भल्मन्सा खेलाइल रहिट । उहाँ २०५२ सालमे विटलपाछे हुकन छावा सरोज चौधरी भल्मन्सा खेलैना पाला लेहल रहिट ।

ओस्टेक रामचन्द चौधरीके बाबा मन्थु चौधरीफे अपन जीवनभर भल्मन्साके भूमिका निभैटी गाउँक सेवा कैना लगाइल रहिट । गाउँक सेवामे लागल मन्थुसेलेके सरोज चौधरीसम हेरेबेर तीन पुस्ते पुगठ । ओस्टेक चौकीदारमे कल्हैयालाल चौधरी फेरसे सर्वसहमतिसे चयन हुइल बाटै ।

गाउँक भल्मन्सा सरोज कहठै, भुरा खेलसे शिक्षामे विशेष जोड डेना कहिगिल बा । धनगढी गाउँक पुरान थारु बस्ती समाज ४१ घरधुरी बा । कलेसे रानाथारुके अलग भन्मन्सा बाटै ।

बड्घर/भल्मन्साके काम घरझगडा, सम्पति, अंशवण्डा सम्बन्धी विवादलगायत देवानी मुद्धाके छिनोफानो कैना, कृषि पेशामे आश्रित थारू समुदायमे पत्येक बरस गाउँके सिचाई कुलुवा बनैना तथा मर्मत सम्भार कैना, गाउँघरके सडक बनैना, भोज तथा मृत्यु संस्कारलगायत कार्यमे गाउँवासीहुकनहे परिचालन कैना रहठ ।

निर्वाचित भल्मन्सा सरोज चौधरी थारु समुदायके बडघर प्रथाहे सरकारसे कानूनी मान्यन्ता डेहे पर्ना माग करले बाटै । ओस्टके गाउँक भुरा खेलसे शिक्षामे जोड डेना, बाल विवाह अन्त्य कैना, छोट लउण्डा कुलटमे फस्टी गैल ओरसे ओहोर ध्यान डेहे पर्ना जोड डेना छलफल हुइल उहाँ बटैलै ।

जनाअवजको टिप्पणीहरू