सुत्केरी महिलनहे पोषण सामाग्री वितरण
पहुरा समाचारदाता
हसुलिया, ६ माघ । कैलालीके कैलारी गाउँपालिकामे सुत्केरी हुइल दुई ठो वडाके ३८ जाने महिलाहुकनके पोषण सामाग्री तथा हाइजिन किट वितरण कैगिल बा ।
गाउँपालिकाभिटरके स्वास्थ्य संस्थामे सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम अन्तर्गत शुकके रोज वडा न ६ ओ ९ के ३८ जाने सुत्केरी महिलाहुकन कोसेली (पोषण सामाग्री तथा हाइजिन किट) वितरण कैगिल हो ।
गाउँपालिकाके उपाध्यक्ष भगवतीकुमारी चौधरीके वडका पहुनामे वडा नम्बर ६ ओ ९ मे सुत्केरी हुइल महिलाहुकनहे पोषण सामाग्री तथा हाइजिन किट) वितरण कैगिल बा । कार्यक्रममे बोल्टी उहाँ कहली, पहिले यी कार्यक्रम लागु हुइल नइरहे, अब्बे हम्रे विजयी हुके आइलपाछे यी कार्यक्रम लागु कैल हो । सुत्केरी महिला हुइलपाछे ढेर चिजके समस्या आइठ । डाईसंग संगे बच्चाके स्वास्थ्य मजा होए कहिके यी कार्यक्रम लागु करल हो ।’
कैलारी गाउँपालिकाके स्वास्थ्य शाखा प्रमुख नरेशकुमार चौधरी सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सक्कु वडामे लागु हुइना बटैलै । उहाँ कहलै, अब्बे माघ आघे वडा नम्बर ७ ओ ५ मे वितरण कैगिल रहे । आज वडा नम्बर ६ ओ ९ नम्बर वडामे उ सामान हस्तान्तरण कैगिल बा । उपाध्यक्षसंग पोषण विशेष कार्यक्रम अन्र्तगत सक्कु वडामे उ सामान वितरण कैजाई । सावन महिनासे अगनह महिनासम लर्का जन्माइल सक्कु लरकोरिया डाईहे उ समान डेटी रहल स्वास्थ्य शाखा प्रमुख बटैलै । ओस्टेक अगहनपाछे सुत्केरीहे चैतमे ओ चैतपाछेक सुत्केरीहे असार मसान्तमे उ समान डेना उहाँ बटैलै ।
उपाध्यक्षसंग पोषण विशेष कार्यक्रम अन्र्तगतके कोसेली झोलामे सुत्केरी डाईक लाग हाइजिन किटमे (व्याग, ब्रस टुथपेष्ट, नोह कटनी, साबुन, सेनेटरी प्याड), बच्चा किटमे बेबी सोप, बेबी स्याम्पु, क्रिम, तेल) ओ पोषण सामाग्रीमे पाँच सय ग्राम घिउ, अण्डा ३० पिस, काजु १०० ग्राम ओ बदाम १०० ग्राम रहल बा । वडा नम्बर ६ मे ७ जनहन ओ वडा नम्बर ९ मे ३१ जनहनके वितरण करल बा ।
वडा नम्बर ९ मे वडा अध्यक्ष खेमराज चौधरीके अध्यक्षतामे हुइल कार्यक्रमके संचालन संजय चौधरी ओ वडा नम्बर ६ मे वडा सदस्य महादेव चौधरीके अध्यक्षतामे हुइल कार्यक्रमके संचालन स्वास्थ्य चौकी प्रमुख गोपाल राना करले रहिट ।
–
–
