थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

कैलारीमे संस्कृति बचाउ कार्यक्रम सुरु

पहुरा | ७ माघ २०७९, शनिबार
कैलारीमे संस्कृति बचाउ कार्यक्रम सुरु

पहुरा समाचारदाता
हसुलिया, ७ माघ ।
कैलालीके कैलारी गाउँपालिका वडा नम्बर २ मे संस्कृति बचाउ कार्यक्रम २०७९ सुरु हुइल बा ।

कैलारी गाउँपालिका वडा नम्बर २ के आयोजना ओ न्यू शुसेली यूवा क्लवके सह आयोजनामे हुइल कार्यक्रमके वडका पहुना गाउँपालिका अध्यक्ष राजसमझ चौधरी रहल रहिट । माघ ७ ओ ८ गते हुइना संचालन हुइना कार्यक्रमके उदघाटन करटी उहाँ थारु समुदाय कला, संस्कृतिके घनी समुदाय रहल ओरसे संस्कृति बचैना जरुरी रहल बटैलै । उहाँ कहलै, ‘कला, संस्कृति हमार पहिचान हो । यिहीहे बचाई नइसेक्लेसे हमार पहिचानफे ओराजाई ।’

आघुनिक पहिरन, कला, संस्कृति हमार पुर्खानके चलाइल रितिरिवाज उप्पर प्रहार हुइटी जाइटा’, गाउँपालिका अध्यक्ष कहलै, ‘पहिले हमार पुर्खा अपन पहिरन घालिट । गरगहनाफे लगाइट ओकर अलगे पहिचान रहे । अब्बे पहिरन ओ गरगहनाफे लोप हुइटी जाइटा । परम्परागत संस्कृतिहे विस्रैटी गैलेसे हमार पहिचानफे नइरही ।’

पुर्खनके ज्ञान, सीप, गीतबाँस लौव पुस्तामे हस्तान्तरण करटी जाई पर्नाफे उहाँ बटैलै । पहिलेक तुलनामे ढेर थारु गीतबाँस बन्टी गैल मने पुरान गितबासहे दस्तावेजीकरण कैना जरुरी रहलफे वडका पहुना अध्यक्ष बटैलै ।

कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी संस्कृति ओ पहिचान जोगैनामे महिलनके भारी हात रहल बटैली । उहाँ कहली, कौनोफे कार्यक्रम, भोजविहा होए वा टरटिहुवार होए महिलाहुक्रे अपन पहिरन घल्ठै मने पुरुष भर आघुनिक पहिरन लगैठै । पहिरन, गरगहना नइलगाइल कारण लोप हुइटी गैल उहाँ बटैली ।

कौनोफे समुदायके पहिचान हेरुवइना बा कलेसे ओइनके भाषा ओ संस्कृतिहे हेरुवाई उ समुदायके पहिचान आपसे आप हेराइजाई’, विशिष्ट पहुना गाउँपालिका उपाध्यक्ष कहली, ‘हमार भाषा, संस्कृतिफे हेरैटी जाइटा यिहीहे संरक्षण कैना जरुरी बा । वडा नम्बर २ से सुरुवाट करल यी कार्यक्रमहे पालिका स्तरीय बनैटी निरन्तरता डेना जरुरी बा ।’

वडा नम्बर २ के अध्यक्ष विकास चौधरीके अध्यक्षतामे हुइल कार्यक्रममे वडा नम्बर ४ के अध्यक्ष ठागुराम चौधरी, वडा नम्बर ८ के वडा अध्यक्ष तारामल कठरिया, कार्यपालिका, वडा सदस्य, नेपाली काँग्रेसके गाउँपालिका सभापति कृष्ण चौधरी, नेपाली काँग्रेसके नेतृ अनिता चौधरी, स्थानीय बृद्धिजिवी, समाजसेवीहुकनके सहभागिता रहे ।

कार्यक्रममे संस्कृति संरक्षणके लाग मघौता नाँच, सखिया नाँच, होरी नाँच, लाठी नाँच, दोहरी नाँचफे प्रर्दशन कैगिल बा । कार्यक्रममे पहुनाहुकनहे स्थानीय खानापनके परिकारसे स्वागत कैगिल बा ।

जनाअवजको टिप्पणीहरू