थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]
‘ पवेरा गाउँ कार्यसमितिहे नविकरण ’

भल्मन्सामे फेरसे खुशीराम

पहुरा | ९ माघ २०७९, सोमबार
भल्मन्सामे फेरसे खुशीराम

पहुरा समाचारदाता
हसुलिया, ९ माघ ।
कैलालीके कैलारी गाउँपालिका वडा नम्बर ५ पवेरा गाउँ कार्यसमितिहे नविकरण कैटी पुरान समितिहे २०८० साल माघ महिनासमके लाग मान्यता डेहल बा ।

सोम्मारके गाउँक भल्मन्सा खुशराम चौधरीके अध्यक्षतामे हुइल माघी डेवानी÷ भुरा खेलसे आघेक कार्यसमितिहे फेरसे दुसर कार्यकालके लाग मान्यता डेहल हो । पवेरा गाउँ कार्यसमितिके भल्मन्सामे खुशीराम चौधरी, उप–भल्मन्सा÷उपाध्यक्षमे प्रेमबहादुर चौधरी, सचिवमे विपराम चौधरी ओ सहसचिवमे परसराम चौधरी फेरसे छनौट हुइल बटै ।

समितिके सदस्यमे विष्णुबाबु कठरिया, रामकृष्ण महतो(कठरिया), शान्तीदेवी चौधरी, अनिता कठरिया, क्षेत्रपाल चौधरी, गलाबसिंह महतों (कठरिया) ओ शंकरसिंह विष्ट रहल बटै ।

ओस्टेक करके नेकीराम महतो(कठरिया)के संयोजकत्वमे सल्लाहकार समिति चयन हुइल बा । जेकर सदस्यमे रामकुमार महतों (कठरिया), तेजराज चौधरी, रामबहादुर महतो (कठरिया), प्रेमबहादुर चौधरी (दहित) ओ टीकाराम चौधरी रहल बटै । ओस्टेक ओरगानमेफे यी बरसके लाग रामनाथ कठरिया सर्वसम्मतसे चयन हुइल बटै ।

भल्मन्सा पदके लाग वर्तमान भल्मन्सा खुशीराम चौधरी ओ निवर्तमान भल्मन्सा रामबहादुर महतों (कठरिया) आकाक्षी डेखल रहिट । भल्मन्सा पदके लाग दुई ठो आकाक्षी डेखा परलपाछे भल्मन्सा चुन्ना जिम्मा उपस्थित समाजहे डेहल गाउँक बुद्धिजीवी समाजसेवी परसराम चौधरी बटैलै ।

उहाँ कहलै, ‘गाउँ समाजके सल्लाहअनुसार सेकटसम चुनावमे नइजाके सहमतिमे मिलैना प्रयाय कैना कहल रहे । सहमतिमे समाधान नइआइलपाछे उम्मेदवारके नाउँ लेके हात उठैना कहल रहे ।’ खुशीराम चौधरीके हकमे बहुमत आइलपाछे गाउँसमाजसे हुकहिनहे दुसर कार्यकालके लाग फेरसे भल्मन्सा बनाइल उहाँ बटैलै ।

भुरा खेलमे गाउँक समाजसेवी बुद्धिजिवी रामकुमार महतो गाउँ समाज सुधार करेक लाग मिल्के जाई पर्ना बटैलै । उहाँ कहलै, ‘ गाउँ एक ठो भल्मन्सा केल चलाई कना नाइहो ओकरपाछे गाउँ कार्य समितिके पदाधिकारी, सदस्य ओ सल्लाहकारफे समिति बा । सक्कु जानेक सल्लाहसे गाउँ आघे बह्री, यम्ने गाउँ समाजके सल्लाह सुझावफे अनिवार्य हुई परल ।’

ओस्टेक करके सचिव विपराम चौधरी २०७८ माघसे २०७९ माघसमके ३ लाख ६९ हजार ७६२ रुप्याके आम्दानी खर्च सार्वजनिक करल रहिट ।

भुरा खेलमे गाउँमे अइना योजनाबारे सक्कु जनहनहे जानकारी कराई पर्ना, समाजमे रहल रकमहे दुख विपतमे परलहुकन सहयोग करे पर्ना, भोज, भटेरमे भल्मन्साके उपस्थिति हुई पर्ना, रामऔतरके घरसे मसानखाम टोलसमके विद्युत तार टरे झुलल ओरसे टन्काई पर्नामे गाउँ समाजसे कार्यसमितिहे ध्यानाकर्षण कराइल रहे । कैलारी गाउँपालिका वडा नम्बर ५ पवेरा गाउँमे २०८ घरधुरी रहल बा । खुशीराम चौधरीके यी बरस भल्मन्सा खेलाइट टिसरा बरस हुइन

जनाअवजको टिप्पणीहरू