लौसामे खखडेहरा कार्यक्रम हुइना
पहुरा समाचारदाता
धनगढी, २९ फागुन । कैलाली जिल्लाके कैलारी गाउँपालिका वडा नं. ८ स्थित लौसा गाउँमे होरी विशेष खखडेहरा कार्यक्रम आयोजना हुइना बा ।
स्थानीय लौसा गाउँ समाज होरी विशेष खखडेहरा कार्यक्रम आयोजक मुल कमिटीके आयोजनामे उ कार्यक्रम यिहे चैत १ गते हुइ लागल हो ।
कठरिया भाषा, संस्कृति ओ पहिचानहे उजागर करैना उदेश्यके साथ आयोजना हुई लागल कार्यक्रममे समुदायके फगुई (होली) ओ खखडेहराके बारेमे जानकारी करैटी टमान मेरिक होरी नाँच लगायत और नाँच, गीतबाँस प्रस्तुत हुइना लौटन कठरिया बटैलै । उहाँ कार्यक्रममे स्थानीय कठरिया कलाकारहुकनके समेत विशेष प्रस्तुती रहना बटैलै ।
कैलारी गाउँपालिकाके आर्थिक सहयोग तथा जनकल्याण युवा क्लवके प्राविधिक सहयोगमे हुई लागल कार्यक्रममे जिल्लाके कठरिया समुदायके उत्साहजनक सहभागीता रहन आयोजक जनैले बा । लौसा गाउँमे निरन्तर कठरिया पहिचानमुलक कार्यक्रम हुइटी आइल बा । यी आघे टिसरा बृहत् होरी महोत्सव समेत आयोजना हुइल रहे ।
