सर्वोत्कृष्ट नतिजासहित टीयू दुसरा ओ टिसरा टपर हुइलै एसपीएके विद्यार्थी

पहुरा समाचारदाता
धनगढी, १ चैत । धनगढीके एसपीए कलेजमे बीएचएमके अध्ययनरत् दुई विद्यार्थी सर्वोत्कृष्ट नतिजासहित विश्वविद्यालय दुसरा ओ टिसरा हुइल बटै ।

त्रिभुवन विश्वविद्यालय(टीयू)से यिहे वर्ष सावनमे लेहल बीएचएम पहिल सेमिष्टरके परीक्षामे ओइन विश्वविद्यालयके दुसर ओ टिसरा हुइल हुइट । सोम्मार प्रकाशित नतिजा अनुसार देउमती चौधरी ओ एनी श्रेष्ठ क्रमशः टीयू दुसरा ओ टिरा हुइल हुइट । देउमतीसे ३.९२ जिपिए ओ अनीसे ३.९१ जिपिए नन्ले बटी ।

‘यी नतिजासे शैक्षिक क्षेत्रमे एसपीए पुनः एक चो अब्बल रहल प्रमाणित करल बा,’ बीएचएम कार्यक्रम निर्देशक डिल्लीराज भण्डारी कहलै, ‘विद्यार्थीके अविरल मिहिनेत, अध्यापक तथा कलेजके साथ सहयोगसे यी सम्भव हुइल हो । अइना दिनमे सक्कु विद्यार्थीहुकनके अभिन प्रगतिके कामना करटी ।’

विश्वविद्यालय दुसरा हुइल विद्यार्थी देउमतीसे निरन्तरके लगाव ओ अध्यापक तथा परिवारके साथ सहयोगसे सफलता मिलल बटैली ।

‘निरन्तरके मिहिनेतसे यी सफलता मिलल हो । गुरुवर्ग, साथीभैया ओ परिवारसेफे पह्रनामे साथ डेलै,’ देउमती कहली, ‘मुख्य बाट टे एसपीएमे बीएचएम पढाई किताबमे केल सीमित नइहो । हम्रे पह्रल बाट व्यवहारमे अभ्यास करटी रहल बटी ।’
सुदूरपश्चिममे बीएचएमके लाग अपने अलगे आधुनिक सक्कु स्रोत साधानयुक्त ल्याब, किचेन, बेकरी, बार, रेस्टुरेन्ट, हाउस किपिङ रहल एक ठो केल शैक्षिक संस्था एसपीए हो ।

बीएचएमहे लक्षित करके कलेजसे अपने अलगे ब्रेडबक्स–द बेकरी क्याफे समेत सञ्चालनमे नन्ले बा । जहाँ विद्यार्थी सिखल बाटमे व्यवहारमे उतर्नाके साथे रोजगारी समेत कैना करठै ।

क्याम्पस प्रमुख योगराज उपाध्यायसे गुणस्तरीय शिक्षाके लाग एसपीए पर्यायवाची शब्द जस्टे हुसेकल बटैलै ।

‘हम्रे अपन विद्यार्थीहे अब्बल बनैना कौनो कसुर बाँकी राखल नइहो । अइसिक विश्वविद्यालयमे हमार विद्यार्थी अब्बल ठहरिनु ओक्रे परिणाम हो,’ क्याम्पस प्रमुख उपाध्याय कहलै, ‘टपर हुइल दुनु जानेसहित उत्तीर्ण हुइल सक्कुहनहे हार्दिक बधाई डेहे चाहठु । अइना दिनमे उहाँहुकनके उज्ज्वल भविष्यके कामना करटु ।’

एसपीएमे बीएचएम अध्ययनरत् विद्यार्थीहुक्रे विदेशके फाइभस्टार होटलमे पेड इन्टर्नसिपमे समेत धमाधम छनौट हुइटी रहल बटै । अघिल्का हप्ता केल एसपीएके सिर्जना खड्का अमेरिकाके होटल हायातमे मासिक दुई लाख ढेर पारिश्रमिक पैना करके करके इन्टर्नसिपमे जासेकल बटी । ओस्टेक बीएचएमके विद्यार्थी बहराईन, कतार, मलेसिया, दुबई, माल्दिभ्स, भारत तथा नेपालके टमान फाइभस्टार होटेलमे कार्यरत बटै ।