संस्कृति संरक्षणके लाग होरी मिलन कार्यक्रम
पहुरा समाचारदाता
धनगढी, १ चैत । रानाथारू समुदायके कला, संस्कृति संरक्षण कैना उद्देश्यसे कैलालीके धनगढी उपमहानगरपालिका वडा नम्बर १७ स्थित पथरी गाउँमे बुधके रोज होरी मिलन कार्यक्रम कैगिल बा ।
कैलालीके धनगढी उपमहानगरपालिका वडा नम्बर १७ स्थित पथरी गाउँ होरी मिलन संचालक समितिके आयोजना ओ धनगढी उपमहानगरपालिका वडा नं १७ के आर्थिक सहयोगमे होरी मिलन कार्यक्रम–२०७९ हुइलक हो ।
कार्यक्रमके वडका पहुना पुर्व संविधान सभा सदस्य माननीय प्यारेलाल राना पहिचानके रुपमे पुर्खानसे चल्टी आइल कला, संस्कृति ओझेलमे परटी गैल ओरसे पुस्तान्तरण कैना आवश्यक रहल बटैलै । उहाँ कहलै, ‘पुर्खानके नाँच्ना नाँच अब्बे पुस्ता नाँचे नइजैना, ओइनके गैना पुरानगितबाँस लोप हुइटी गैल बा, पहिचान झल्कना पहिरनफे हेरैटी गैल बा ।’
रानाथारूके पहिचान जोगैना कला, संस्कृति जोगैना आवश्यक रहल उहाँ बटैलै ।
कार्यक्रमके विशिष्ट पहुना धनगढी–१७ का वडाध्यक्ष माधवराज राना, नेपाली कांग्रेस कैलाली–५ के सभापति तथा धनगढी–७ के पुर्व वडाध्यक्ष सीताराम राना, धनगढी वडा नम्बर १७ का वडा प्रतिनिधि, शिवगंगा वन समितिके अध्यक्ष हर्षराज राना, भलमन्सा, समाजसेवी, बुद्धिजीवी होरी मिलन कार्यक्रमसे संस्कृति संरक्षणके टेवा पुग्ना बटैलै ।
होरी मिलन कार्यक्रम संचालक समितिके संयोजक सरीता रानाके अध्यक्षतामे कार्यक्रम निम्जल रहे । कार्यक्रममे रानाथारू समुदायसे नाँचजैना टमान नाँच प्रस्तुत कैगिल बा ।
