कैलारीमे १२१ जाने सिकलसेलके लौवरोगीके पहिचान
पहुरा समाचारदाता
हसुलिया, ७ वैशाख । कैलाली जिल्लाके कैलारी गाउँपालिकामे १ सय २१ जाने सिकलसेलके लौव विमारी पत्ता लागल बटै ।
थारु समुदायहुक्रे यी रोगसे ढेर प्रभावित हुइल ओरसे सिकलसेल रोग पहिचान करेक लाग यिहे वैशाख ३ गतेसे ६ गतेसम निःशुल्क शिविर संचालन कैगिल रहे । कैलारी गाउँपालिकामे करिब ९६ प्रतिशत थारु समुदायके बसोबास रहल बा ।
गाउँपालिकाके नौ वडामे रहल प्राथमिक स्वास्थ्य केन्द्र, स्वास्थ्य चौकीमे सिकलसेल रोगके पहिचान करेक लाग संचालन हुइल निःशुल्क शिविरमे १ सय २१ जाने सिकलसेलके लौवा विमारी भेटल कैलारी गाउँपालिकाके स्वास्थ्य शाखा प्रमुुख नरेशकुमार चौधरी बटैलै ।
बसौटी स्वास्थ्य चौकी उजलीसेमरामे कैगिल सिकलसेकल रोगके पहिचान शिविरमे ७६ जानेक जाँच करेबेर १३ जहनमे, हसुलिया स्वास्थ्य चौकी, टिसेनडाँडामे १५१ जानेक जाँच करेबेर १८ जहनमे ओ पवेरा स्वास्थ्य चौकीमे १५९ जहनके जाँच करेबेर १५ जहनमे सिकलसेल पोजेटिभ डेखल स्वास्थ्य शाखा प्रमुख चौधरी बटैलै ।
ओस्टेक कैलारीके रतनपुर स्वास्थ्य चौकी बसन्ता १९० जानेक जाँच करेबेर ३१, उदासीपुर प्राथमिक स्वास्थ्य केन्द्रमे १३२ जानेक जाँच करेबेर १९ ओ गदरिया स्वास्थ्य चौकी गदरिया बजारमे १९८ जानेक जाँच करेबेर २५ जनहनमे सिकलसेल पोजेटिभ डेखल वहाँ बटैलै । यिहीसे आघे कैलारी गाउँपालिकामे ८८ जाने सिकलसेल रोगके विमारी विरुवा करैटी रहल स्वास्थ्य शाखा प्रमुख चौधरी बटैलै ।
