नियमित खोपके सुद्धीढीकरण तथा पूर्ण खोप सुनिश्चितता कार्यक्रम

पहुरा समाचाारदाता
हसुलिया, १३ बैशाख । कैलालीके कैलारीमे नियमित खोपके सुद्धीढीकरण तथा पूर्ण खोप सुनिश्चितता कार्यक्रम हुइल बा ।

यिहे बैशाख ११ से १७ गतेसम संचालन हुइटी रहल खोप सप्ताह अभियानहे सफल बनाइक लाग कैलारी गाउँपालिकाके स्वास्थ्य शाखाके आयोजनामे नियमित खोपके सुद्धीढीकरण तथा पूर्ण खोप सुनिश्चितता कार्यक्रम हुइल हो । गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे कैलारी गाउँपालिकाके स्वास्थ्य शाखाके प्रमुख नरेशकुमार चौधरी कैलारी गाउँपालिकामे खोपके अवस्थाबारे जानकारी डेहल रहिट । कैलाली जिल्लाके अवस्था हेरेबेर खोपमे कैलारीके मजा पहुँच पुगल उहाँ बटैलै । पालिकाहे पूर्ण खोप बनाइक लाग माघ, फागुन ओ चैतसे घरधुरी सर्वेक्षण करटी रहल ओ जलम थेनसे १५ महिना टरेक बालबालिकाहे खोप लगैटी रहल उहाँ बटैलै ।

सुक्ष्मयोजना अद्यावधिक ओ पूर्ण खोप दिगोपना कार्यक्रम प्रभावकारी नइहुइनाके कारण, खोपके बारेमे पूर्ण जानकारी नइहुइना ओ प्रभावकारी परामर्श नइहुइल ओरसे शून्य खोप तथा ड्प आउटके संख्या बह्रटी गैल उहाँ बटैलै । स्थानीय, जिल्ला, प्रदेश तथा संघ बीच समन्वयके अभाव हुइल, खोप सेवाहे प्राथमिकता नइडेहल ओ दोहोरो बसाई, खोपके महत्व बारेमे टमान निकायसे जानकारी, प्रचारप्रसारमे कमी हुइना, खोप केन्द्र भवन नइहुइना, खुला ठाँउमे खोप चल्न, महामार डेखा परल कारण खोपमे ड्रप आउटके समस्या बह्रल शाखा प्रमुख बटैलै ।

ओस्टेक करके कैलारी गाउँपालिकाके स्वास्थ्य शाखाके सिनियर आहेव अधिकृत विरेन्द्रप्रसाद सापकोटा खोप छुट बच्चाहुकनके पहिचान ओ विश्लेशन कैना प्रक्रिया ओ अवसररबारे जानकारी डेहल रहिट । गैल बरस कैलारीहे पूर्ण खोप युक्त पालिका घोषणा कैना सफल हुइल रहे, उहाँ कहलै, अशौफे तयारी करटी रहल बटैलै । ओस्टेक करके वडा पूर्ण खोप सुनिश्चितता समन्वय समिति गठन करके आघे बह्रना उहाँ बटैलै ।

ओस्टेक करके स्वास्थ्य शाखा प्रमुखसे स्वास्थ्यकर्मीहुक्रे तीन महिनासे तलब नइपाइल ओ ओकर मागसहित आन्दोलन रहल ओकर विकल्प निकारडेना आग्रह करल रहिट । कार्यक्रममे सम्बोधन करटी गाउँपालिका अध्यक्ष राजसमझ चौधरी स्वास्थ्यकर्मीके देश व्यापी मुद्दा रहल ओरसे कैलारीमे अपने यी बाटमे गम्भीर रहल बटैलै । कैैलारी गाउँपालिकाके सामाजिक विकास संयोजक तथा वडा नम्बर ३ के वडा अध्यक्ष सन्तराम चौधरी मन्तव्य व्यक्त करल रहिट ।
कार्यक्रममे वडा अध्यक्ष, कार्यपालिका सदस्य, स्वास्थ्यकर्मी, टमान शाखाके प्रमुखहुकननके सहभागिता रहे ।