अभिनफे रोग नुकैना प्रवृति बाः गाउँपालिका अध्यक्ष

पहुरा समाचारदाता
हसुलिया, १३ बैशाख । कैलालीके कैलारीमे जनप्रतिनिधि तथा सरोकारवालाहुकनहे कुष्ठरोग निवारण तथा एलपेप सम्बन्धी अभिमुखीकरण कार्यक्रम कैगिल बा ।

कैलारी गाउँपालिका स्वास्थ्य शाखाके आयोजनामे कुष्ठरोग खोजपडताल तथा एलपेप सम्बन्धी अभिमुखीकरण कार्यक्रम कैगिल हो । गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे सहजीकरण स्वास्थ्य शाखा प्रमुख नरेशकुमार चौधरी करल रहिट ।

कार्यक्रमे क्षय÷कुष्ठरोग अधिकृत देव जोशी कुष्ठरोगबारे जानकारी डेटी स्वास्प्रस्वासके माध्यमसे किटणु सरना ओ यी रोग स्नायू, छालामे लग्ना बटैलै । सुरुमे मुसुवा प्रजातीसे सरल यी रोग कुष्ठरोगी रोगके बाहक रहल बटैलै । कुष्ठरोग आँखी, हात गोरमे असर कैना उहाँ जनैलै ।

एनएलआरके कार्यक्रम अधिकृत मानबहादुर महरा सम्पर्क व्यक्ति, पारिवारिक सम्पर्क, सामाजिक सम्पर्क ओ सामुदायिक सम्पर्कमे रहुइया यी रोगके जोखिम रहल बटैलै ।

एनएनएसडब्लुओ कार्यक्रम संयोजक केशव अवस्थी कैलारी गाउँपालिकामे पाँच जाने यी रोगके संक्रमित रहल ओ व्याङकेट कार्यक्रम संचालन बटैलै । उहाँ सक्कु वडामे यी कार्यक्रम लागु कैनाफे जानकारी डेहल रहिट ।

कार्यक्रममे गाउँपालिका अध्यक्ष राजसमझ चौधरी गाउँघरमे अभिनफे रोग नुकैना प्रवृति रहल ओरसे पालिकाहे कुष्ठरोग मुक्त बनाइक लाग सक्कु जानेक आवश्यक रना बटैले बटै । कार्यक्रममे वडा अध्यक्ष, कार्र्यपालिका सदस्य, स्वास्थ्यकर्मी तथा टमान शाखाके प्रमुखहुकनके सहभागिता रहे ।