बालबालिकाहे प्रतिभाके लाग प्लेटफर्मके आवश्यकः उपाध्यक्ष चौधरी

पहुरा समाचारदाता
हसुलिया, ४ जेठ । कैलाली जिल्लाके कैलारी गाउँपालिकामे दुई दिने पालिका स्तरीय बाल भेला निम्जल बा ।

बाल कल्याण संघ टीकापुर, वल्र्डभिजन इन्टरनेशनल नेपालके आयोजना तथा कैलारी गाउँपालिका महिला तथा बालबालिका शाखाके समन्वयममे दुई दिने पालिका स्तरीय बाल भेला हुइल हो ।

दुुई दिने बाल भेला समापन कार्यक्रममे गाउँपालिका उपाध्यक्ष भगवतीकुमारी चौधरी गाउँघरमे बालबालिका भिटर टमान प्रतिभा नुकल रहना मने प्रदर्शन कैना ठाउँके आवश्यकता रहल बटैली । उहाँ कहली, कैलारी गाउँपालिकाभिटरके टमान बालबालिकामे ढेर प्रतिभा नुकल बा । सार्वजनिक ठाउँमे प्रदर्शन कैना ठाउँ नइहुके ओइनके प्रतिभा बाहेर आइनइसेकल हो ।,
गाउँपालिकासे बालबालिकाके प्रतिभा बाहेर नन्ना अभ्यास करटी रहल ओ टमान कार्यक्रम आयोजना कैसेकल उहाँ बटैली । नेपालके संविधानमे बाल अधिकार सम्बन्धी टमान ऐन कानून बनल ओरसे बालबालिकाफे यी बारे चासो लेहे पर्ना उहाँ बटैली ।

बालबालिकाहुकनके संरक्षण, बाल अधिकार ओ विकासके लाग विनियोजन हुइल बजेट तथा कार्यक्रम जानकारी बाल कल्याण संघ टीकापुरके फिल्ड अधिकृत परशुराम चौधरी बटैलै । बाल भेलामे बाल अधिकार, नीति तथा योजना तर्जुमालगायत टमान विषयबस्तुबारे अभ्यास कैगिल उहाँ बटैलै ।

ओस्टेक करके बालभेलामे गाउँपालिका उपाध्यक्ष भगवतीकुमारी चौधरीहे सात बुदँे अ बुझागिल बा ।
नेपालके संविधानमे रहल व्यवस्था नेपालसे अन्तराष्ट्रिय स्वरमे जनाइल प्रतिवद्धता, विद्यमान कानून, नीति, योजना ओ कार्यक्रमहहे मध्यनजर करटी वालवालिकाहुकनके हक अधिकार ओ ओइनके सर्वोत्तमहितके सम्मान एवं कार्यान्वयन करेक लाग पालिकास्तरिय बाल भेलामे ७ बुँदे ध्यानाकर्षण बुझाइल हो ।

ध्यानाकर्षण पत्रमे समाजे रहल कुप्रथा, लागु पदार्थ दुब्र्यसन, वालविवाह सम्वन्धी जनचेतनामूलक कार्यक्रम, सरोकारवालसंग अन्तरक्रिया कार्यक्रम ओ सडक नाटक करे पर्ना माग करल बा ।

बालबालिकाहुकनके लाग जीवन उपयोगी रूपान्तरण कक्षा संचालन करे पर्ना, योजना छनौट प्रक्रियामे वालवालिकाहरुुकनहे अर्थपूर्ण सहभागी कराई पर्ना, वडास्तरमे रहल बाल क्लवहुकनहे बाल संरक्षण सम्बन्धी तालिम संचालन करे पर्ना माग करल बा ।

ओस्टेकक करके सकारात्मक अभिभावक शिक्षा कक्षा संचालन करे पर्ना, वडा तथा पालिका स्तरीय बाल क्लव, बाल भेला संचालन करे पर्ना, पढाईसे बन्चित रहल विपन्न ओ अपाङगता रहल बाल वालिकाहे शैक्षिक सामग्री, ड्रेस, छात्रवृतिके व्यवस्था करे पर्ना माग कैगिल बा ।

दुई दिने बाल भेलामे बाल कल्याण संघ टीकापुरके फिल्ड अधिकृत परशुराम चौधरी ओ बाल कल्याण संघ टीकापुरके फिल्ड सुपरभाइजर सोनुराम चौधरी प्रशिक्षण डेहल रहिट ।