सुदूरपश्चिम प्रदेशमे मन्त्री मण्डल विस्तार

पहुरा समाचारदाता
धनगढी, ६ जेठ । सुदूरपश्चिम प्रदेशमे मन्त्री मण्डल विस्तार कैगिल बा ।

मुख्यमन्त्री कमलबहादुर शाहसे नेपाली कांग्रेस ओ नेकपा माओवादी केन्द्रके नेताहुकनहे सहभागी कराके मन्त्रिपरिषद् विस्तार करल हुइट । नेपाली कांग्रेससे बझाङके पृथ्वीबहादुर सिंहहे आन्तरिक मामिला तथा कानुन मन्त्रालयके जिम्मेवारी डेहल बा ।

नेकपा माओवादी केन्द्रसे झपट साउदहे सामाजिक विकास मन्त्रालय ओ रमेश धामीहे उद्योग, पर्यटन, वन तथा वातावरण मन्त्रालयके जिम्मेवारी डेहल हो । माओवादीके गीतादेवी मालहे उद्योग, पर्यटन, वन तथा वातावरण राज्यमन्त्रीके जिम्मेवारीसहित शपथ ग्रहण कराइल बा ।

सत्तारुढ दल नाउपा सरकार बाहेर रहल बा । २ मन्त्रालय पाई पर्ना अडानमे रहल नाउपाहे १ मन्त्रालय केल डेना हुइलपाछे बाहेर रहल हो । प्रदेश प्रमुख देवराज जोशी शनिच्चरके रोज लौवा मन्त्रीहुकनहे शपथ ग्रहण करले बटै ।
२०७९ के माघ २६ गते मुख्यमन्त्री नियुक्त हुइल शाहसे नेपाली कांग्रेसके प्रकाशबहादुर देउवाहे भौतिक पूर्वाधार विकास ओ नेकपा एकीकृत समाजवादीके नरेश कुमार शाहीहे आर्थिक मामिला मन्त्रालयके जिम्मेवारी डेहल रहे ।