मुक्त कमैया पुनर्स्थापनाके लाग पालिका स्तरीय अन्तर सम्वाद
पहुरा समाचारदाता
बर्दिया, ८ जेठ । मुक्त कमैया पुनर्स्थापनाके लाग पालिकास्तरीय अन्तर सम्वाद अटवारके रोज बासगढीमे निम्जल बा ।
राष्ट्रिय भुमि आयोग बर्दियाके सदस्य जागेश्वर थारुके अध्यक्षतामे सम्वाद कार्यक्रममे वडका पहुना बासगढी नगर प्रमुख खडक बहादुर खडका रहल रहिट । नेपाल सरकार २०५७ सालमे साउन २ गते कमैया मुक्त घोषणा करल रहे । घोषणा पाछे बर्दियामे ११ हजार सय ९७ घर परिवार मुक्त कमैया परिचय पत्र पैले बटै । जेम्ने १० हजार ७ सय ३२ घरपरिवार पुनःस्थापना होस्याकल बटै । ‘पुनःस्थापना हुईना बाँकी ६५ घरपरिवारमध्ये ५३ घरपरिवार हालसम सम्पर्कमे आईल नइहुइट ।
बर्दिया जिल्लामे ९० जाने मुक्त कमैया हुक्रे जग्गा धनी पुर्जा पैले बटै मने उ जग्गा उपभोग करे नइपैले हुइट । पुनःस्थापना हुइना बाँकी ओ हाथमे पुर्जा लेके जग्गा उपभोग करे नइपाईल कैहिके जम्मा १०२ जाने पुनःस्थापना हुइना बाँकी डेखा परल बटै ।
मुक्त कमैया पुनस्थापनाके लाग ५ कटठा जग्गा ३५ क्यु पिट कठवा ओ १० हजार रुप्या डेना कहिके निर्णय करल रहे । नागरीकहुकनसे सब्से लग्घक सरकार मुक्त कमैयन्के छाई छावन निशुल्क शिक्षा डेलक बाट उपप्रमुख ईन्दीरा चौधरी बटैैली ।
कमैया जागरण समाजके आयोजना एक्सन एड नेपाल मुक्त कमैया महिला जागरण नेपालके आर्थिक सहयोगमे हुईल कार्यक्रममे मुक्त कमैया महिला जागरण नेपालके अध्यक्ष विरुनि थारु सरकार मुक्तकमैयाहे पुनस्र्थापनामे चासो नइलेहल बटैली ।
मुक्त कमैया पुनस्थापनाके लाग पालिका स्तरीय अन्तर सम्वाद कार्यक्रममे बाँसगढी नगरपालिका भिटरके सरोकारवाला, मुक्त कमैया सुकुमवासीहुकनके सहभागिता रहे ।
–
–
