तीन महिने सिलाई कटाई तालिम निम्जल
पहुरा समाचारदाता
हसुलिया, १० जेठ । कैलालीके कैलारी गाउँपालिका वडा नम्बर ९ मे तीन महिने सिलाई कटाई तालिम निम्जल बा ।
कैलारी गाउँपालिकाके आर्थिक सहयोगमे धनगढी मल्टी स्किल इन्स्च्यिूटके सहजीकरणमे मुक्त कमलरी तथा पाछे परल महिलाहुकनके लाग तीन महिने सिलाई कटाई डेगिल हो ।
तालिम समापन कार्यक्रम कैलारी गाउँपालिकाके उपाध्यक्ष भगवतीकुमारी चौधरीके वडका पहुनामे हुइल रहे । कार्यक्रममे बोल्टी उहाँ महिला सीपमुलक तालिम सिखलपाछे आत्मनिर्भर बन्टी गैल बटैली । सीप सिखलपाछे महिलाहुक्रे अपनही व्यापार व्यवसाय सुरु करलपाछे घरपरिवारहे सहयोग पुगल उहाँ बटैली । महिलाके आर्थिक स्रोतमे बृद्धि हुइलपाछे हिंसाके घटनामेफे कमी अइना उहाँ बटैली ।
वडा सदस्य शान्ति चौधरीके अध्यक्षतामे हुइल समापन कार्यक्रममे पूर्वाधार समिति संयोजक प्रेम बहादुर चौधरी, वडा सदस्य तथा अनुगमन समिति संयोजक सुनिला चौधरी, योजना शाखा प्रमुख सन्तोषकुमार चौधरी, रोजगार सहायक इन्द्रश्याम चौधरी, स.इ. सुनिल चौधरी, धनगढी मल्टी स्किल इन्स्च्यिूटके प्रमुख राजाराम चौधरीलगायत सहभागिता रहे । तालिम फागुन ५ गतेसे सुरु हुइल रहे ।
