एडिविसे धनगढीमे योजनाहे निरन्तरता डेना

पहुरा समाचारदाता
धनगढी, ११ जेठ । कैलालीके धनगढी उपमहानगरपालिकामे एसियायी विकास बैंकसे बाँकी योजनाहे दुई बर्षके लाग निरन्तरता डेना जनागिल बा ।

विफेक रोज हुइल छलफल कार्यक्रममे एशियाली विकास बैंकसे क्षेत्रीय शहरी विकास आयोजनाके म्याद २ बर्ष थप करके बाँकी फिर्ता लैगिल योजनाहे निरन्तरता डेना धनगढी उपमहानगरपालिका जनैले बा ।

धनगढी उपमहानगरपालिकामे एसियायी विकास बैंकके सहयोगमे संचालित क्षेत्रीय सहरी विकास आयोजनाके पहिल चरणमे १०.२५ किमी सडक निर्माण ओ २०.५० किमि नाली निर्माणके काम अन्तिम चरणमे रहल बा । ओस्टेक करके एकिकृत फोहोरमैला व्यवस्थापन केन्द्र निर्माण कैना प्रारम्भ हुइना अवस्थामे रहल बा ।

ओस्टेक करके धनगढीमे छनोट हुके बाँकी रहल योजनाके दुई बर्ष म्याद थप कैके सडक खण्ड ३२ किमि सडक नाली निर्माण कैनाके साथे एकीकृत खानेपानी तथा सरसफाई आयोजना अन्तर्गत ढल निकास, खानेपानी, सार्वजनिक नाला सरक्षणके लाग कोरिडोर निर्माण (कैलाली नालामे) तथा तालतलैया सरक्षणमे लगानी कैना विषयमे छलफल हुइल बा ।

यी सम्बन्धमे प्रतिनिधि सभा सदस्य आर्जु राणा, सुदूरपश्चिम प्रदेश सरकारके मुख्यमन्त्री कमलबहादुर शाह, सुदूरपश्चिम प्रदेश सरकारके भौतिक पुर्वाधार विकास मन्त्री प्रकाश देउवा, एडिबी परियोजनाके कन्ट्री डाइरेक्टर अर्नाउड एम कौकोइस, अर्थशास्त्री सदस्य सिंह खड्का, इकाई प्रमुख पोर्टफोलियो व्यवस्थापन ओ फोकल, शहरी विकास ओ जलवायु परिवर्तन अर्नाउड हेकम्यानसे छलफल हुइल रहे ।