दादुरा रुबेला खोप संचालन कैना
पहुरा समाचारदाता
धनगढी, ११ जेठ । सुदूरपश्चिम प्रदेशके जिल्लामे दादुरा रुवेला खोप संचालनके लाग अभिमुखीकरण छलफल कार्यक्रम कैगिल बा ।
सुदूरपश्चिम प्रदेश स्वास्थ्य निर्देशनालयके आयोजनामे विफेक रोज धनगढीमे स्वास्थ्यकर्मी ओ सरोकारवाला निकाय विच छलफल कार्यक्रम कैगिल हो । जिल्ला खोप समन्वय समितिके अध्यक्ष खगराज भुषालके अध्यक्षतामे हुइल कार्यक्रममे सहायक प्रमुख जिल्ला अधिकारी यज्ञराज जोशी खोप अभियान सफल बनैना सक्कु जानेक सक्रियता आवश्यक रहल बटैलै । उहाँ कहलै, कौनो ठाउँमे खोप अभियानहे लपारवाही करलेसे लक्ष्यमे पुगाइक लाग फेरसे सुरु करेपरठ । अभियान संचालन कैना ढेर मंहगा परठ । यम्ने स्वास्थ्यकर्मी, अभिभावक लगायत सरोकारवालाके समन्वय कैके आघे बह्रना जरुरी बा ।’
स्वास्थ्य तालिम केन्द्रके प्रमुख नरेन्द्र सिंह कार्की हम्रे ९५ प्रतिशत कभरेज पुगैना बाट करटीबेर अभिन मिसिङ केस ढेर रहल ओरसे उपलब्धी हासिल कैना कहाँसे कम्जोरी हुइटा उहीहे औल्याके आघे बह्रना जरुरी रहल बटैलै ।
देशभर २० प्रतिशत बालबालिका पूर्णखोप नइपाइल ४ प्रतिशत बालबालिका खोपसे बञ्चित रहल उहाँ बटैलै ।
स्वास्थ्य कार्यालय धनगढीके प्रमुख लालबहादुर धामी इटा भटठामे काम कैना, भारतमे मजदुरी करुइयाके बालबालिका खोपसे बञ्चित हुइल बटैलै । उहाँ कहलै, बैशाख महिनामे संचालन हुइल खोज ओ खोप अभियानमे खोपसे बञ्चित हुइल ढेर बालबालिका खोप सेवा पैले बटै ।
कार्यक्रममे स्वास्थ्य तथा जनसंख्या मन्त्रालय काडमाडौंके भरत भण्डारी राष्ट्रिय खोप कार्यक्रमके उद्देश्य, लक्ष्य ओ दादुरा रोग निवारणके रणनिति एवं अवस्थाबारे जानकारी डेहल रहिट ।
सुदूरपश्चिम प्रदेशमे फेरसे संचालन कैना दादुरा रुवेला खोप अभियानके उद्देश्य ६ महिनासे १५ बरसके बालबालिकाहे दादुरा रुबेला विरुद्धके खोप प्रदान करके समुदायमे रोग प्रतिरोधात्मक क्षमता बह्रैना रहल बा ।
–
–
