यूवाहे अवसरके खाँचोः मन्त्री साउँद

पहुरा समाचारदाता
धनगढी, १५ चैत । सुदूरपश्चिम प्रदेशके धनगढीमे दुई दिने प्रादेशिक नीति संवाद तथा यूवा महोत्सव सुरु हुइल बा ।

शनिच्चरके रोजसे सुरु हुइल कार्यक्रमके उदघाटन करटी सुदूरपश्चिम प्रदेश सामाजिक विकास मन्त्री झपट बहादुर साउँद यूवाहे अब्बे अवसरके खाँचो रहल बटैले बटै ।

उहाँ कहलै, ‘मै स्मरण कराउ सुदूरपश्चिममे गरिबी, भोकमरी, छुवाछुट, अशिक्षा बा । केन्द्रीयकृत राज्य सत्ता रहेबेर मोरङके एक ठो जिल्ला बराबरके बजेट सुदूरपश्चिममे आए । कर्णाणीमे पुल नइबनटसम सुदूरपश्चिम जबफे ओझेलमे परल रहे । काठमाण्डौ जाइक लाग भारतके रुपैडियाके डगर जाई पर्ना बाध्यता रहे ।’

प्रदेश सरकार बजेटके पूर्व सन्ध्यामे बा, मन्त्री साउद कहलै, अब्बे नीति कार्यक्रममे यूवाहे पहिल प्राथमिकतामे धारबी । यूवाहे हरेक क्षेत्रमे सहभागि कराई नइसेक्लेसे देशके विकास हुई नइसेकी । रोजगारीके सन्र्दभमे हम्रे का करले बटी कलेसे आब पासपोर्ट, राहदानी नाही रोजगारीके सृजना कैना जरुरी बा ।’

उहाँ कहलै,‘पछिल्का समयमे यूवा शक्ति विदेश जैटी रहल बटै । मने यहाँ रहल स्रोत साधनहे प्रयोगमे नाने सेक्लेसे प्रदेशभिटरे रोजगारी सृजना करे सेक्ना अवस्था बा । यहाँ प्रर्यटकीय क्षेत्र बा, जंगल बा, प्रदेश सरकार ओकर सदुपयोग कैना हो कलेसे टमान रोजगारीके अवस्था सृजना करेसेक्जाई ।

औरे प्रसङमे बोल्टी उहाँ सुदूरपश्चिम प्रदेशमे लागु औषधके समस्या बह्रटी रहल बटैलै । कैलाली ओ कञ्चनपुरके केन्द्र विन्दु बनाके पहाडमे लागु औषध सप्लायर्स कैजाइटा । यी हमार सुदूरपश्चिम प्रदेशके लाग भयानक डर लाग्दो अवस्था हो । यिहीसे बच्ना ओ बचैना सचेत रहना उहाँ आग्रह करलै ।

आशा ओ भरोसाके शक्ति लागु औषधमे फस्टा, उहाँ कहलै, यिहे अवस्था रहलेसे विकासमे असर परी । प्रदेशमे भयवाह स्थिति आई सेकी । प्रत्येक दिन नेपाल प्रहरीसे पक्राउ परुइयामे लागु औषध सबसे ढेर बा । हत्याके घटना दिन प्रतिदिन बह्रटा यिहीहे रोकेक लाग यूवा शक्ति जागरुक पर्ना जरुरी बा ।

समाज कल्याण परिषदके कोषाध्यक्ष विनय लामा आब यूवाके आवश्यकता पहिचानन करके काम कैना जरुरी रहल बटैलैै । नेपालमे ४१ प्रतिशत यूवा जनसंख्या बा, उहाँ कहलै, मने यूवामे लगानी नइलगाइल कारण यूवा शक्ति विदेश पलायन हुइटी रहल बा । यूवाहुकनके विदेश जैेनासे रोक्लेसे केल विकास हुई ।

यूवा प्रतिनिधि निर्मला टेर आब सैद्धान्तिक शिक्षा नाही व्यवहारिक शिक्षाके आवश्यकता रहल बटैली । सुुदूरपश्चिम प्रदेशमे ढेर स्रोत साधन रहल ओरसे ओकर सदुपयोग करके आम्दानीके स्रोत बह्रैना ओ स्थानीयस्तरमे रोजगारी सृजना कैना उहाँ आग्रह करली ।

कार्यक्रममे स्वास्तिका खत्री महिलाहुक्रे महिनाबारी हुइलबेला पसलमे प्याड लेहे जाइबेर अप्ध्यारो हुइल बटैली । अँटवारके रोज महिनावारी दिवस परल ओरसे सुदूरपश्चिम प्रदेश सामाजिक विकास मन्त्री झपटबहादुर साउँद लगायत नौ जाने यूवाहुकनहे पुनः प्रयोगमे नाने सेक्ना सेनेटरी प्याड हस्तान्तरण करल रहिट ।

वल्र्ड भिजन इन्टरनेशनल नेपाल सुदूरपश्चिम ओ कर्णाली प्रदेश इन्चार्ज चेतराज भट्टराई अपन देशफे बाहेर जाके पैसा कमाई सेक्ना भावनाके विकास रहल बटैलै । उहाँ ३२ हजार बालबालिकासंग काम करटी रहल । सुदूरपश्चिम प्रदेशके १८ ठो स्थानीय तहमे काम करटी रहल, यूवा शक्ति कुलटमे काम करटी रहल बटैलै ।

यूवालयके अध्यक्ष सन्तोष महर्जनके अध्यक्षतामे उद्घाटन कार्यक्रम हुइल बा । कार्यक्रममे सुदूरपश्चिम प्रदेशके नौ जिल्लाके यूवाहुकनके सहभागिता रहल बा ।