रेशम चौधरी रिहा

काठमाडौं, १५ जेठ । नागरिक उन्मुक्ति पार्टीके नेता रेशम चौधरी आज बिहान डिल्लीबजार कारागारसे रिहा हुइल बटै । उहाँ ६ बरसपाछे जेल जीवन विटाके रिहा हुइल रहिट । रिहा हुइलपाछे पत्रकारहुकनसंग बाटचित करटी उहाँ टिकापुर घटनामे सहादतप्राप्त व्यक्तिके परिवारसेफे न्याय पाई पर्ना बटैले बटै । ओकर लाग अपनेफे सघैना बटैले बटै ।

डिल्लीबजार कारागारसे रिहा हुइलपाछे पत्रकारहुकनसंग बाटचित करटी चौधरी कहलै, ‘उ अढाइ वर्षे बच्चा टेकबहादुर साउदके आत्मासे पुण्य प्राप्त करे परठ । उहाँहुकनके लाग लरडेना हमारफे नैतिक दायित्व हो । उहाँहुक्रे सोचल जैसिन यी घटना हो कि नइहो, अन्तिम सत्य पत्ता पाई परठ ।’

अपन गोसिया, छावा ओ डाडुभैयाके देहान्त कैसिक हुइल कना पत्ता पैना चेष्टा करही पर्ना बटैटी उहाँ कहलै, ‘मै फे उहाँहुकनके सघाई चाहठु ओ सिंगो नागरिक उन्मुक्ति पार्टीफे उहाँहुकनहे सघैना चाहठ ।’
अपनेहुक्रे आन्दोलनकर्मी ओ टिकापुर घटनामे सहादतप्राप्त परिवारके वेदना एक्के रहल कहटी उहाँ एक दुसरविच अन्तरक्रिया करे पर्ना समेत बटैलै । उहाँ कहलै, ‘हम्रे आन्दोलनकर्मी ओ सहादतप्राप्त परिवारबीचमेफे अन्तरक्रिया करे परठ । उहाँहुकनके आरोप हम्रे सुने परठ । हमार वेदना उहाँहुक्रे सुने परठ । वेदना दुनहुकजके एक्के हो । कोई कुहीहे आरोप लगाके पन्छे नइमिली । हम्रै वेदना साटासाट करके असली दोषीहे राज्यसे कारबाही करे परठ ।’

पुनः उच्चस्तरीय आयोग गठनके माग

चौधरीसे लाल आयोगके प्रतिवेदन सार्वजनिक करे पर्ना ओ टिकापुर घटनाके शुद्ध छानबिन करे पर्ना कहटी ओकर लाग फेरसे उच्चस्तरीय आयोग गठन करे पर्ना बटैले बटै ।
टिकापुर घटनाके निरुपण सरकारसे हाली करे पर्ना बटैटी उहाँ कहलै, ‘टिकापुर घटनाके शुद्ध छानबिन करे परठ । टिकापुर घटना हुइबेर पचासौ हजार मनै खुल्ला आँखीसे घटना हुइल डेख्ले बटै । उ धरातलमे रहल नागरिकसंग पुछे परल । टिकापुर घटनाहे अपन खुल्ला आँखीसे डेखल व्यक्तिहुकनके वयान लेहे परठ, ज जैसिन हुइलेसेफे यिहीहे निराकरण कैना दायित्व राज्यके हो । राज्यसे हाली यकर निराकरण करे परठ ।’
चौधरीसे आज माइतीघरमे कोणसभा करके आजु कैलाली जैना जानकारी डेलै । टिकापुर घटनामे दोषी ठहर हुके जेलमे रहल औरफे हाली रिहा हुइना उहाँ बटैलै । अइना कुवाँर ३ गते वा उहीसे आघे ओइनके रिहाइके पहल हुइटी रहल जानकारी उहाँ डेलै ।
थरुहट थारुवान संघर्ष समितिसे २०७२ साल भदौ ७ गते कैलालीके टिकापुरमे करल प्रदर्शनसे हिंसात्मक रुप लेके नेपाल प्रहरीके एसएसपी लक्ष्मण न्यौपानेसहित ८ जानेक मृत्यु हुइल रहे । उहे घटनामे दोषी ठहर हुके आजीवन काराबासके सजाय पाइल चौधरीहे सरकारसे गणतन्त्र दिवसके अवसर पारके सजाय माफी डेहलपाछे चौधरी सोम्मार सकारे रिहा हुइल हुइट ।