बाढ पीडितहे हटैना सूचनाप्रति पालिकाके ध्यानाकर्षण

पहुरा समाचारदाता
हसुलिया, १६ जेठ । कैलाली जिल्लाके कैलारी गाउँपालिका वडा नं. १, ५ ओ ७ मे बसोबास करल बाढ प्रभावितहे सात दिनभिटरे अतिक्रमित क्षेत्र खाली सूचनाप्रति पालिकाके ध्यानाकर्षण हुइल जनैले बा ।

सव डिभिजन वन कार्यालय वसन्तासे यिहे जेठ १४ गतेके दिन सार्वजनिक सूचना प्रकाशन करके वसन्ता वन क्षेत्र (कैलारी गाउँपालिका वडा नं. १, ५ ओ ७ के मंझरा, वैजपुर, मनिकापुर, सपना शिविर, बन्दर गौडी, वसन्ता, छोटी वसन्ता, शिवरतनपुर, तिघरी, मिलनपुर ओ भुईयाफांटा लगायतके वस्ती ७ दिनभिटर खाली कैना सूचना करले बा ।

मंगरके रोज गाउँपालिका अध्यक्ष राजसमझ चौधरी कैलारी गाउँपालिका जिल्लाके अति बाढ प्रभावित गाउँपालिकामे रुपमे रहल ओरसे यी पालिकाके लडिया तटीय क्षेत्रके वासिन्दा पानी जन्य विपदसे प्रभावित हुइना करल ओरसे वर्षायामके समय अइटी रहल ओरसे हटैना कार्य तत्काल रोक्का कैना, स्थगित कैना आग्रह करले बटै ।

कैलारी गाउंपालिका वडा नं. १, ५ ओ ७ के मझरा, वैजपुर, मनिकापुर, सपना शिविर, बन्दरगौडी, वसन्ता, छोटी वसन्ता, शिवरतनपुर, तिघरी, मिलनपुर ओ भुइयाफाँटा लगायतके वस्ती २०६४ सालके वाढसे प्रभावित हुके उ स्थानमे टमान निकायसंग हुइल समन्वय तथा सहमति अनुसार बसोवास करटी रहल बा ।

सव डिभिजन वन कार्यालय वसन्तासे प्रकाशित उ सूचनाके सम्बन्धमे स्थानीय राजनितक दल तथा अन्य सरोकारवालासंग हुइल छलफलमे वर्षायामके समयमे यैसिन कार्य तत्काल रोक्का÷ स्थगित कैना सहमति हुइल अनुसार ओकर सम्बन्धमे सम्बन्धित निकायसे कैलारी गाउँपालिका समन्वयके लाग समेत अनुरोध करल अध्यक्ष कहलै बटै ।

जंगल बैठना केकरो रहर नइहो, बाढ प्रभावितहुक्रे बाध्यताबस बैठना बाध्य हुइल बटै,’ उहाँ कहलै, ‘कैलारीके लडिया तटिया क्षेत्रके बासी बहुट पीडित बटै । उचित बासके व्यवस्थापन कैना सरोकारवाला निकायके दायित्व हो ।’

कैलारी गाउँपालिकाके मुख्य सवालके रुपमे रहल नदी नियन्त्रण, वाढ पीडितके उचित व्यवस्थापनके लाग नेपाल सरकार तथा नेपाल सरकारके सम्बन्धित निकाय, प्रदेश सरकार तथा प्रदेश सरकारके सम्बन्धित विकास साझेदार तथा कैलारी गाउँपालिका बासीनसे आग्रह कैगिल बा ।

ओस्टेक कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम बाढ पीडितहे उठैना निर्णय गलत रहल बटैले बटै । पहिलेफे बार बार उठैना बहस चलल रहे । हम्रे केन्द्रहे जनदबाब डेली । स्थानीय सरकारहे वन ऐनसे कौनो अधिकार डेहल नइहो । दुसर व्यवस्थापन नइहुइटसम उहे ठाउँमे बैठे डेहे पर्ना उहाँ बटैलै ।