बेहडाबाबा मन्दिरमे दशनार्थीके भीड
पहुरा समाचारदाता
धनगढी, १७ जेठ । कैलालीके धनगढी उपमहानगरपालिका–१६ मे रहल प्रसिद्ध बेहडाबाबा मन्दिरमे दशनार्थीके भीड लागल बा ।
गंगा दशहराके अवसरमे पूजापाठ ओ मन्दिरके दर्शन करुइयनके मंगरके रोज भीड लागल हो । हरेक बरस जेठ महिनाके शुक्लपक्ष दशमी तिथिके दिन गंगा दशहराके अवसरमे नेपाल भारतके दशनार्थी मन्दिरमे पूजाआजा कैनाके साथे शिव भगवानके दर्शन कैना करठै ।
मन्दिर व्यवस्थापन समितिके अध्यक्ष पदमराज जोशी जानकारी डेलैबेहडाबाबाके पत्ता भारतीयसे लगाइल कारणसे बेहडाबाबाप्रति भारतीय नागरिकके विशेष लगाव रहल बटैलै । पहिले भारतिय नागरिक ढेर पूजापाठ ओ दर्शनके लाग आइट अब्बे नेपालीहुकनके आस्थाफे बह्रल उहाँ बटैलै ।
पुर्खानके कहाई अनुसार राणाशासन कालमे भारतसे नेपालसम रेल चले । उहे बेला भारतके गोला कना ठाउँसे ग्लावा यहाँके दुमलिया, धुरझन्नामे गैया चराई आइट ।
गैया चरैना क्रममे घरमे गैया बच्चा पाइल मने घरे दुध नइडेहे । उ गैया बेहडा बाबा मन्दिर रहल ठाउँमे दुध डेहे अध्यक्ष कहलै ।
उ बाट ग्वालासे पत्ता लगाईबेर उ ठाउँके ब्राहमण खोदके लैजाई खोज्लै मने नइसेक्लै । लग्गेक ढुुंगाके टुक्रा भारतके गोलामे लैजाके काटेबेर खुन निकरल, उ शिलाके धारके गोलामे अब्बेफे एक ठो बेहडाबाबा मन्दिर रहल अध्यक्ष जोशी बटैलै ।
यहाँ भारतके उत्तर प्रदेशसे ढेर संख्यामे दशनार्थी अइना करठै । जेठ १४ गतेसे हालसम पुजापाठकके लाग भारतिय नागरिक केल ७ लाख दर्शन करल अध्यक्ष बटैलै । १४ गतेसे १९ गते सब १० से १५ लाखसे पूजापाठ ओ दर्शन कैना उहाँ बटैलै ।
ओस्टके, नेपाली तीर्थालु भर जेठ १९ गतेसम अइना जनाइल बा । बेहडाबाबा मन्दिरके दर्शनसहित पूजाआजा कैनासे सुख, शान्ति, समृद्धि प्राप्त हुइना विश्वास रहल ओरसे डुरडुरसे कष्टपूर्ण यात्रा कैके दशनार्थी बेहडाबाबाके दर्शन करे अइना करल भारतीय नागरिक अशोक सिंह बटैलै । उहाँ कहलै, पहिले हमार बुदु, बाबनके पुुजापाठके लाग आइल अब्बे हम्रेफे अइठी ।
डगरा सहज नैरहल कारण समस्या हुइना करलेसे फेन बेहडाबाबाप्रतिके विश्वासके कारण हरेक बरस दर्शन करे आइल भारतके उत्तर प्रदेश खिरी ब्ल्याके नियाके सोहनलाल साहु बटैलै । दशनार्थीके घुँइचो रलेसे फेन व्यवस्थापन भर फितलो डेखल रहे । सडक जामसे दशनार्थी कष्टपूर्ण यात्रा कैके बेहडाबाबासम अइना जैना कार्य करटी रहल बटै । बेहडाबाबा धनगढीसे ११ किलोमिटरके दूरीमे रहल बा ।
मेलामे पार्किङके नाउँमे रकम असुली बेहडाबाबा गंगा दशहरा मेलामे पार्किङके नाउँमे रकम असुली करल पाइल बा । धनगढी उपमहानगरपालिका १६ रामपुरमे रहल बेहडाबाबामे मंगरसे सुरू हुइल गंगा दशहरा मेलामे सवारी पार्किङके नाउँमे रकम असुली हुइ लागल पाइल स्थानीय बटैले बटै । मेला हेरे अउइया आन्तरिक तथा बाह्य क्षेत्रसे आइल भक्तजनसे मन्दिर व्यवस्थापन समितिसे पार्किङके नाउँमे चर्को असुली करे लागल सर्वसाधारण गुनासो करले बटै ।
मन्दिर व्यवस्थापन समितिसे मोटरसाइकल, स्कुटर पार्किङ करल १ सय, अटोरिक्सा पार्किङके २ सय, ट्याक्टरके तीन सय, जिप ओ कारके २ सय पचास ओ बस पार्किङ करल ४५० असुली करटी रहल बटै । मन्दिर दर्शन करे अउइयासे जथाभाबी रकम असुली हुइ लागल कहटी चर्को आलोचना हुइल बा ।
यहोर मन्दिर व्यवस्थान समितिसे पार्किङ शुल्क घटाके लेना बटैले बा । मन्दिर व्यवस्थापन समितिके अध्यक्ष पदमराज जोशी मोटरसाइकल ओ स्कुटरके ६० रुपैयाँ ओ कार जिपके १२५ रुपैयाँ लेना निर्देशन डेहल अध्यक्ष जोशी बटैलै ।
