मुक्त कमलरी विकास मञ्चसे सामाजिक विकास मन्त्रीहे अइना कार्यत्रमके योजना पेश

पहुरा समाचारदाता
धनगढी, १७ जेठ । मुक्त कमलरी विकास मञ्चसे सुदूरपश्चिम प्रदेश सरकार सामाजिक विकास मन्त्री झपटबहादुर साउदहे मुक्त कमलरीके अवस्था ओ अइना बर्षके योजनाबारे ज्ञापनपत्र बुझैले बटै ।

मञ्चके केन्द्रीय हिरा चौधरीके नेतृत्व गैल टोली टमान योजनासहिट सामाजिक विकास मन्त्री साउदहे ज्ञापनपत्र बुझाइल हुइट । योजनामे टीकापुर ओ सेहरीमे रहल मुक्तकमलरीहुकनके निशुल्क शिक्षा संगे डेटी आइल छात्रवृतिमे बृद्धि करे फर्ना माग कैगिल बा । मुक्तकमरीहुत्रे महिना ४ हजार पैटी रहल बटै । उहीहे बढाके ८ हजार करे ओ १२ महिना छात्रवृतिके व्यवस्था कैना माग करल बा । अब्बे १० महिना केल छात्रवृति पैटी रहल बटै ।

ज्ञापनपत्रमे विशेष प्याकेजसहित कृषि कार्यक्रमके व्यवस्था करे पर्ना, मुक्त कमलरीके मृतक परिवारहे, वेपत्ता ओ कुमारी डाईनहे राहतके व्यवस्था करेपर्ना, कृषि व्यवसाय करुइयाके लाग लिजके व्यवस्था करे पर्ना, १०० जनहनहे बृटिक तालिम ओ व्यवसाय संचालनके विउ पुँजीके व्यवस्था करे पर्ना, १०० जनहनहे कम्प्यूटर शिक्षा, बंगुर, बाख्रा पालनके व्यवस्था ओ बजारीकरणके माग करल केन्द्रीय अध्यक्ष हिरा चौधरी बटैली । ओस्टेक उहाँ मुक्तकमलरी विकास मञ्चके लाग कार्यालय भवनके मागफे करल बटैेली ।

ज्ञापनपत्र बुझटी सामाजिक विकास मन्त्री साउद मुक्तकमलरीके मुद्दाप्रति अपने सकारात्मक रहल बटैलै । ज्ञापनपत्र बुझाई मञ्चके केन्द्रीय अध्यक्ष हिरा चौधरी, केन्द्रीय सचिव सुनिता चौधरी, पूर्व केन्द्रीय अध्यक्ष सुनिता चौधरी, कैलाली जिल्ला अध्यक्ष विन्द्रा चौधरी, कञ्चनपुर जिल्ला अध्यक्ष सिता चौधरी ओ कार्यक्रम संयोजक सुलोचना चौधरीलगायत सहभागिता रहे ।