मुक्तकमैया,हलिया, कमलरीहुकनके समस्याबारे सवांद कार्यक्रम

पहुरा समाचारदाता
धनगढी, १८ जेठ । सुदूरपश्चिम प्रदेश सरकारके अइना बर्षके नीति तथा कार्यक्रम ओ बजेटमे मुक्तककैया, हलिया, कमलरीहुकनके समस्याबारे प्रदेश स्तरीय सवांद कार्यक्रम निम्जल बा ।

मुक्तकमैया महिला विकास मञ्च ओ राष्ट्रिय हलिया महाससंघ सुदूरपश्चिम प्रदेशके संयूक्त आयोजनामे बुधके रोज धनगढीमे हुइल कार्यक्रममे वडका पहुना सामाजिक विकास मन्त्री झपटबहादुर साउद रहल रहिट । कार्यक्रममे बोल्टी उहाँ मुक्तकमैया, हलिया, कमलरीहुकनके लाग अइना बजेटमे ओइनके माग समेट प्रतिबद्धता जनैलैै । साथे यी समुदायके लाग निशुल्क या न्यूनटम मुल्यमे स्वास्थ्य विमाके व्यवस्था कैना बटैले बटै । स्वास्थ्यके लाग नीति तथा कार्यक्रममे समेटनाफे बटैले बटै ।

सुदूरपश्चिम प्रदेशससभा सदस्य धर्मराज पाठक मुक्तकमैया, हलिया, कमलरी महंगा विद्यालय, सुविधा सम्पन्न रहल स्वास्थ्य संस्थामे उपचार कैनासे बञ्चित रहल बटैले बटै । ओइनहे वन अतिक्रमके करल दोष लगैना मने केकर घर महंगा मजा, मजा फर्निचर, झयाल ढोकासे बनल घर बा सोचे पर्ना बा उहाँ कहलै ।

मुक्तकमैया, हलिया, कमलरीके घर जाके हेरी सामान्य खटिया हुई । जे अतिक्रमणके दोष लगाइट ओइनके घर जाके हेरी तीन चार तल्लाके भवन हुई । ओम्ने लागल कठुवाके कटरा लागल हुई हेरके केल सीमान्तकृत समुदायहे दोष लगैना उहाँ कहलै ।

प्रदेशसभा सदस्य ओम प्रकाश भाट कमैया, हलियाहुकनहे मुत्तल घोषणा करके लडिया बगर, बनुवाक किनारमे धारल बटैलै । उहाँ कहलै, मुक्त कमैया, हलियाहुकनके पुनस्र्थापना करे खोजल हो की सदाके मुक्त करे खोजल हो ।’

मुक्त कमैया, हलिया ओ कमलरीहुकनके श्रमसे विमुख पारे खोजल उहाँ बटैलै । मुक्तकमैया, हलियासे पाइल जग्गा बैंकमे धारे नइमिल्ना हुइलपाछे कुछ व्यवसाय संचालन करे नइपैना, सीमान्तकृत समुदायके लाग जीवनउपयोगी कार्यक्रम कटौटी हुइलपाछे ओइने भारतमे न्यून ज्यालामे काम कैना बाध्य हुइलफे प्रदेशसभा सदस्य भाट बटैलै ।

प्रदेशसभा सदस्य जानकी कुँवर मुक्तकमैया हलिया, कमलरी मुक्त करल कागजमे सीमित रहल बटैली । मुक्त हुइल ढेर बरस हुइलेसेफे पुनस्र्थापना नइहुके शिक्षा स्वास्थ्य गाँस बास कपास लगायत आधारभूत मानवअधिकार सेवा सुविधासे बञ्चित हुइल बटैली । प्रदेश सरकार नीति कार्यक्रम तथा बजेटबारे छलफलमे जुुटल ओरसे मुक्तकमैया हलिया, कमलरीके माग मुद्दा समेटना पहल कैना बटैली ।

कार्यक्रममे सुदूरपश्चिम प्रदेशके मुख्य न्यायधिवक्ता कुलानन्द उपाध्यक्ष मुक्तकमैया हलिया, कमलरीके लाग बन्टी रहल कानुनके ड्राफट दुई चो ढोकासे लौटल बटैलै । उहाँ कहलै, उ ऐन घोषणा हुइना अवस्थामे रहे । मने काहे रुकल यम्ने सरोकारलावा चासोके साथ हेरे पर्ना बटैलै ।

संविधानसभा सदस्य हरिश्रीपाइली सामाजिक मुद्दा उठानके लाग बजेट विनियोजन हुई छोरल बटैलै । मुक्तकमैया हलिया, कमलरीके समस्या अभिनफे कायमे रहल ओरसे नीति तथा कार्यक्रम ओ बजेटमे मुद्दा माग सम्बोधनके लाग दवाब जारी रख्ना उहाँ बटैलै । मुक्तकमैया हलिया, कमलरीके न्यायिक पुनस्र्थापनाके लाग एक चो फेरसे पुनस्र्थापना समिति बनाके अध्ययन अनुगमन करटी सरकारहे प्रतिवेदन बुझाई पर्ना जरुरी रहल बटैलै ।

मुक्तकमैया हलिया, कमलरी आन्दोलनके अभियन्ता गणेश विक मुक्ती घोषणा पाछे नेताहुक्रे सस्ता लोकप्रियता कमाइक लाग भुठा प्रतिवद्धता जनाइल बटैलै । मुक्तकमैया हलिया, कमलरीहुकनके समस्या जातिक समाधान कैना हो कलेसे प्रदेश सरकारसे पुनस्र्थापनाके प्याकेज बनाके आघे बह्रलेसे केल समस्या समाधान हुइना बटैलै ।

मुक्तकमैया हलिया, कमलरी आन्दोलनके अभियन्ता बालाराम भटटराई संघीता अइनासे आघे मुक्त करल मुक्तकमैया हलिया, कमलरीके अवस्था जस्टेक तस्टे रहल बटैलै । मुलुक बदलगिल मने ओइने अवस्था जस्टेक तस्टे रहल बटैलै । प्रदेश सरकारसे पुनस्र्थापना हुइना बाँकी मुक्तकमैया, हलियाहुकनहे जग्गा किनके डेलेसे पुनस्र्थापना करे सेक्ना बटैलै । मुक्तकमैया हलियाहुकनके डेहल जग्गाके रेकर्ड मालपोत ओ नापीके रेकर्डमे नइररहल उहाँ बटैलै ।

मुक्तकमैया हलिया, कमलरी आन्दोलनके अभियन्ता यज्ञराज चौधरी सरकार सीमान्तकृत समुदायके मुद्दा नइसुनल बटैलै । उहाँ कहलै, अभिनसम कटरा, आन्दोलन, ज्ञापनपत्र, डेलिगेसन, धर्ना डेलेसेफे कुछ सुनुवाई नइहुइल बटैलै । कोई नेता धर्ना डेलेसे ओइनथेन पुगके तुरुन्त सुनुवाई कैना मने मुक्तकमैया हलिया, कमलरी आन्दोलनप्रति वास्ता नइकरल उहाँ बटैलै ।

कार्यक्रममे अ‍े कार्यक्रम संयोजक इन्द्र चौधरी मुक्तकमैया, कमलरीके अवस्थाबारे कार्यपत्र प्रस्तुत करल रहिट । मुक्तकमैया महिला विकास मञ्चके अध्यक्ष सिमा चौधरीके अध्यक्षतामे हुुइल कार्यक्रममे उहाँ मुक्तकमैया लालपुर्जा पैलेसेफे जग्गाके ठेगान नइरहल बटैली । कलेसे मुक्तकमलरी निशुल्क ओ उच्च शिक्षासे बञ्चित हुइल बटैली ।कार्यक्रमके संचालन हुकुम सार्की करल रहिट ।