टमान योजनाके अनुगमन
पहुरा समाचारदाता
हसुलिया, २२ जेठ । कैलारी गाउँपालिकामे संचालित योजनाके पालिका स्तरीय अनुगमन समुहसे योजनाके अनुगमन कैगिल बा ।
कैलारी गाउँपालिकाके उपाध्यक्ष तथा अनुगमन समिति संयोजक भगवतीकुमारी चौधरीके नेतृत्वमे सोम्मारके रोज अनुगमन कैगिल हो । वडा नम्बर १ स्थित कटैनी लडियामे मन्भरा मनाउ झेलुंगे पुल जैविक तटबन्ध ६ लाख रुप्या बजेटमे ३ सय १५ मिटर निर्माण हुइल जैविक तटबन्धके अनुगमन कैगिल बा ।
वडा नम्बर ९ स्थित गदरियामे रहल जनता माविके २० लाख बजेटमे निर्माण सम्पन्न हुइल भवनके अनुगमन कैगिल बा । वडा नम्बर २ के स्वास्थ्य चौकीके अनुगमन कैगिल बा ।
ओस्टेक सुर्मीनाला बढैपुर अन्र्तगत भर्खर हुइल कालोपत्रेके सडकके गाउँपालिका अध्यक्ष राजसमझ चौधरी अनुगमन करले बटै । उहाँ कहलै, जौन मेरके काम हुई पर्ना हो, ओसिन नइहुइल हो । ठेकेदारके लापारवाही डेखल बा । मै ठेकेदारहे कहेबेर सुधार करम कहले बा, उहाँ कहलै ।
सुर्मीनाला बढैपुर अन्र्तगत भर्खर हुइल कालोपत्रेके सडकमे लापारवाही डेखल बा । बाँकी काममे ढिला सु्स्तीफे हुइटी रहल बा । गाउँपालिकासे सम्बन्धित निकायहे अनुगमनके लाग मंगरके रोज (आज) पत्र पठैनाफे गाउँपालिका अध्यक्ष बटैलै ।
टमानमे हुइल योजनाके अनुगमनमे समुहके संयोजक भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, योजना शाखा प्रमुख सन्तोषकुमार चौधरी, प्राविधिक सुनिल चौधरी, वडा सदस्य शान्ति चौधरीलगायतके सहभागिता रहे ।
–
–
