दीपेन्द्र ओ वर्षा उत्कृष्ट वर्ष खेलाडी
पहुरा समाचारदाता
धनगढी, १५ असार । क्रिकेटके दीपेन्द्रसिंह ऐरी ओ फुटबलके वर्षा ओली चौथा संस्करणके ‘एसपिए सुदूरपश्चिम स्पोर्टस अवार्ड २०७९’ के वर्ष खेलाडी घोषित हुइल बटै । खेलकुद पत्रकार मञ्च कैलालीके आयोजनामे शुकके रोज धनगढीमे सम्पन्न अवार्डमे दुनु जाने उ अवार्ड हात पारल हुइट ।
दीपेन्द्रसे एथलेटिक्सके शिवराज पार्की ओ कबड्डीके प्रकाश गिरीहे पाछे परटी उ अवार्ड हात पारल हुइट । दीपेन्द्रसे गैल वर्ष नेपालहे विश्वकप क्वालिफायरमे पुगैले रहिट । साथे उहाँ गैल वर्ष टी २० अन्तराष्ट्रियमे एक हजार रन बनैना ओ एक दिवसीयमे करिअरके पहिल शतक प्रहार कैना खेलाडी समेत बनल रहिट ।
ओस्टेक करके महिलाओर उत्कृष्ट खेलाडी बनल वर्षा गैल वर्ष नेपालहे पहिल बार यु १५ साफ च्याम्पीयनसीपके उपाधि जिताईबेर उत्कृष्ट प्रदर्शन कैना खेलाडी हुइट । उहाँ उमेर समुह वा सिनियर साफ च्याम्पीयनसीप ओ दक्षिण एसियाली खेलकुदमे नेपाली टोलीके उपाधि खडेरी तुरटी ह्याटिक सहित ५ गोल कैना खेलाडी समेत हुइट ।
गैल वर्ष नेपाली यु १५ टोलीसे साफ च्याम्पीयनसीपमे बंगलादेश विरुद्धके जित हात पारेबेर उहाँ निर्णायक गोल करल हुइट । उहाँ गैल वर्ष यु १७ साफ च्याम्पीयनसीपमे ३ गोल समेत करल रहिट । ओस्टेक उहाँ एफसी छनोटके सक्कु खेल खेल्टी गोल कैना नेपाली खेलाडी समेत हुइट ।
ओस्टेक करके सुदूरपश्चिम वर्षके अवार्ड युवा खेलाडी क्रिकेटके हेमन्त धामी जिटलै । धामी भारोत्तोलनके हेमन्त पाल ओ क्रिकेटके अनु कडायतहे पाछे परलै । हेमन्त गैल वर्ष नेपालहे यु १९ विश्वकप क्रिकेटमे पुगैना उत्कृष्ट प्रदर्शन करल रहिट ।
ओस्टेक वर्ष प्रशिक्षकके अवार्ड क्रिकेटके जगत टमटा हात परलै । टमटासे गैल वर्ष नेपालहे यु १९ विश्वकप क्रिकेटमे पुगाइल रहिट । उहाँ ८ बर्षपाछे नेपालहे यु १९ विश्वकपमे कमब्याक करैना प्रशिक्षक हुइट । उहाँ नेपाली महिला क्रिकेट टोलीहे कतार विरुद्धके सिरिज जिताइलफे रहिट । उहाँ कुस्तीके राजेन्द्र चन्द ओ भारात्तोलनके जीवन गौतमहे पाछे परलै ।
सुदुरपश्चिम आईकन पुरुषओर फेन्सिङके जलेन्द्र शाही घोषित हुइलै । शाही ९ औ राष्ट्रिय खेलकुदमे सुदुरपश्चिमके लाग स्वर्ण पदक डेहुवाइ रहिट । उहाँ फुटबलके जियारत सेख (फुटबल) ओ आनन्द कामी (कराँते)हे पाछे परल रहिट ।
सुदुरपश्चिम आईकन महिला फुटबलके दिपा रोकाया घोषित हुइटी । दीपाके कप्तानीमे नेपालसे गतवर्ष पहिल चो यु १५ साफ च्याम्पीयनसीपके उपाधि जिटल रहिट । उहाँ कविता कुँवर (क्रिकेट) ओ मनिषा सिंह (कुस्ती)हे पाछे परटी उ अवार्ड जिटल रहिट ।
लाइफ टाइम एचिभमेन्ट विष्टहे
भलिबलके प्रशिक्षक सहदेव विष्टहे लाइफ टाइम एचिभमेन्ट प्रदान कैगिल । २०२२ सालमे सुदूरपश्चिमके पहाडी जिल्ला बैतडीमे जन्मल विष्ट कलिलै उमेरसे भलिबल खेले सुरु करल रहिट ।
स्कुलमे पह्रेबेर विरेन्द्र सिल्डके पहिल सहभागीतामे उत्कृष्ट खेलाडी बनल विष्ट उहे प्रतियोगिता हुइटी क्षेत्रीय टीममे परके धनकुटामे राष्ट्रिय प्रतियोगिता खेल्लै । जहाँ साविकके सुदूरपश्चिम विकास क्षेत्र टिसरा हुइल रहे । ०४२ सालमे हुइल दुसरा राष्ट्रिय खेलकुद प्रतियोगितामे सहभागी हुइलपाछे उहाँक ढोका नेपाली राष्ट्रिय भलिबल टीमके लागल खुलल ।
उ क्रममे हुइल मैत्रीपूर्ण प्रतियोगितामे २० वर्षे उमेरमे तहल्का मच्चैलै । काठमाडौं ओ उत्तर प्रदेशमे हुइल मैत्रीपूर्ण खेलमे उत्कृष्ट प्रदर्शन करल कारण उहाँ सन् १९८६ मे दक्षिण कोरियाके सोलमे हुइना एसियाली खेलकुदके लाग छनोट हुइलै । नेपाली भलिबल टीमसे उहोर ओर एशियन गेमके अनुभव लेहे पाइल नइहो । एसियाली खेलकुदमे सहभागीता जनैना उहाँ सुदूरपश्चिमके एक ठो खेलाडी हुइट ।
स्पेशल अवार्ड ः चन्द ओ कामीहे
कुस्तीके राजेन्द्र चन्द कराँतेके आनन्द कामीहे स्पेशल अवार्ड प्रदान कैगिल । कुस्तीके चन्दके प्रशिक्षकत्वमे सुदूरपश्चिमसे नवौँ राष्ट्रिय खेलकुद प्रतियोगितामे पाँच स्वर्ण, एक रजत ओ तीन कांस्य पदक जितल रहिट ।
ओस्टेक कैलालीके गोदावरी नगरपालिका– १२ ओलानीमे भुटला कटना सैलुन समेत करटी रहल कराँतेके आनन्द कामी ०७९ सालमे गण्डकी प्रदेशमे हुइल नवौँ राष्ट्रिय खेलकुद अन्तरगत कराँते प्रतियोगितामे सुदूरपश्चिम प्रदेशहे स्वर्ण पदक डेहुवइना सफल हुइल रहिट । पर्वतके कुश्मामे हुइल राष्ट्रिय कराँते प्रतियोगितामे कामीसे ५० किलो ग्राम तौल समूह अन्तरगत कुमुतेमे स्वर्ण पदक जित्न सफल हुइल उहाँहे स्पेशल अवार्ड प्रदान करल खेलकुद पत्रकार मञ्चके अध्यक्ष प्रदीप पाठक बटैलै ।
उत्कृष्ट खेलाडी पुरुष ओ महिला विधाके विजेताहे ३५÷३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफटाईम एचिभमेन्ट अवार्डके विजेताहे २५÷२५ हजार, सुदूरपश्चिम आइकन महिला ओ पुरुष विधाके विजेताहे नगद २० हजारसहित ट्रफी, मेडल ओ प्रमाणपत्र प्रदान करल रहे ।
–
–
