शिअ क्वानके च्याम्पियन टिम तथा पदक विजेता खेलाडीहे सम्मान
पहुरा समाचारदाता
धनगढी, २५ असार । टिसरा अन्तर क्वान खुला राष्ट्रिय उसु प्रतियोगिताके च्याम्पियन टिम तथा खेलाडीहे धनगढीमे सम्मान करल बा । नेपाल उसु महासंघ सुदूरपश्चिम प्रदेश कमिटीसे च्याम्पियन टिम शिअ उसु क्वानसहित उत्कृष्ट, उदयमान तथा पदक विजेता खेलाडीहे सम्मान करल हो ।
शुकके काठमाडौमे सम्पन्न टिसरा अन्तर क्वान खुला राष्ट्रिय उसु प्रतियोगितामे चार स्वर्ण ओ सात रजत पदकसहित शिअ क्वान च्याम्पियन टिम बनल रहे । स्वर्ण पदक पैनामे अलिसा खाती, अस्मिता गाहामगर, पुष्पा कुँवर ओ मुकेश कार्की रहल बटै रजत पदक पैनामे मन्जु धामी, सृजना रखाल मगर, सुवास बुढा, हरिचन्द्र कार्की, अलिसा खाती, पुष्पा कुँवर ओ दिपक चौधरी रहल बटै कलेसे दिपिका चौधरी काश्य पदक विजेता बनल रहिट ।
प्रतियोगितामे काठमाडौँ उसु क्वान दुसरा हुइल रहे । दुसरा हुइल काठमाडौँ उसु क्वानसे चार स्वर्ण ओ तीन रजत पदक जिटल रहे । कलेसे टिसरा हुइल निन्जा उसु क्वानसे समान तीन स्वर्ण ओ तीन रजक पदक हात पारल सुदूरपश्चिम प्रदेश उसु संघके उपाध्यक्ष एवं कैलाली जिल्ला उसु प्राविधिक टेनिकल कमिटीके संयोजक राजीव गुप्ता जानकारी डेलैं ।
शीर्ष तीन स्थान हात पर्ना टोलीसे क्रमशः ३० हजार, २० हजार ओर १० हजार रुप्या नगद पुरस्कार हात पारल रहिट ।
ओस्टेक करके सान्सौंके पुरुषमे काठमाडौँके निश्चल तामाङ ओ महिलामे शिअके अस्मिता गाहा मगर सर्वोत्कृष्ट खेलाडी चुनल रहिट कलेसे थाउलोमे शिअके ओमप्रकाश ओली ओ सान्सौंमे काठमाडौँके मिलन राई उदयमान खेलाडी घोषित हुइल रहिट ।
प्रतियोगितामे पदक विजेता खेलाडी तथा सहभागिहे सम्मान करटी महासंघके प्रदेश अध्यक्ष दुश्यान्त बस्नेत टीका लगैटी बधाई तथा अइना दिनमे थप पदक विजेता बन्न खेलाडीहे प्रोत्साहन करल रहिट ।
–
–
