नेपालके क्रिकेटमे सुदूरपश्चिमके भारी योगदानः मन्त्री देउवा
पहुरा समाचारदाता
धनगढी, २ भदौ । सुदूरपश्चिम प्रदेशके भौतिक पूर्वाधार विकास मन्त्री प्रकाश देउवा नेपाली क्रिकेटके इतिहासमे सुदूरपश्चिमके भारी योगदान रहल बटैले बटै ।
शनिच्चरके रोज धनगढीमे सुदूरपश्चिम प्रादेशिक क्रिकेट संघके दुसरा साधारण सभाके उद्घाटन समारोहमे बोल्टी मन्त्री देउवा नेपाली क्रिकेटके व्यवस्थापन, समन्वय ओ खेलाडी उत्पादनके दृष्टिकोणसे सदा अग्रणी भूमिकामे रहल बटैलै ।
हाल नेपाल क्रिकेट संघके नेतृत्वमे सुदूरपश्चिमके नेतृत्वमे रहल बटैटी उहाँ सुदूरपश्चिमके क्रिकेट लगायत समग्र खेलकुदके विकासके लाग प्रदेश सरकारसे अपन तवरसे सेक्ना सहयोग कैना वचनवद्धता व्यक्त करलै । उ समारोहमे बोल्टी मन्त्री देउवा फाप्ला क्रिकेट मैदान निर्माणके लाग डीपीआर लगायत आवश्यक प्रक्रियागत काम आघे बह्रल जानकारी डेलै ।
क्रिकेट खेलकुदसंगे सुदूरपश्चिमके अन्य विकासके लाग फे खेलकुदमे लगानी बढाई पर्ना आवश्यकता रहल औल्यइलै । प्रदेशके खेलकुद विकासके लाग प्रदेश खेलकुद परिषदसे छिटपुट रुपमे काम करलेसेफे परिणाममुखी काम डेखाई नइसेकल उहाक कहाई बा ।
नेपाल क्रिकेट संघ क्यानके अध्यक्ष चतुर बहादुर चन्द नेपाली खेलकुदमे सबसे हाली विश्वकप खेल्न खेल किक्रेट हुइल ओरसे राज्यसे लगानी बढाई पर्ना बटैले बटै ।
नेपालमे और ढेर खेल लोकप्रिय रहलसेफे तत्काल विश्वकपममे सहभागी हुजैना अवस्था नइडेखल ओरसे सरकारसे क्रिकेट खेलमे लगानी बढाके देशके क्रिकेटके स्तरहे आउर उप्पर पु¥याई पर्ना बटैलै । उहाँ नेपाली क्रिकेटहे विश्वसे चिन्हसेकल ओरसे आब उत्कृष्टताके लाग राज्यसे विशेष पहल चाले पर्ना बटैलै ।
हम्रहिनहे आइसिसीसे एकदम विश्वास करले बा, पत्यइले बा टबमारे बारम्बार नेपालहे अवसर डेटी रहल बा । सन २०२४ मे अमेरिका ओ वेस्टइण्डिजमे संयुक्त रूपमे आयोजना हुइना टि ट्वाण्टी विश्वकप एसिया क्वालिफायरके आयोजना कैना जिम्मा नेपालहे डेना, सन २०२७ मे यु १७ महिला विश्वकपके सह आयोजक नेपालहे बनाइल ओरसे नेपालप्रती आइसिसी बहुट सकारात्मक ओ नेपाली क्रिकेटके क्रेजहे लग्गेसे नियल्टी रहल बा । टबमारे यी स्वर्णिम अवसरहे समयमे हम्रे सदुपयोग करे पर्ना ओ आबके समय भौतिक पुर्वाधारमे लागे पर्ना अध्यक्ष चन्द बटैठै ।
नेपालमे क्रिकेटके क्रेज डेखके विश्वके अधिकांश देश नेपाल आई चाहलसेफे हम्रे सुरक्षासहितके स्टेडियम बनाई नइसेक्के उ सम्भव नइहुइटी रहल चन्द बटैलै ।
खेल पर्यटनसे अरबौं कमाई सेक्ना सम्भावना रहल देशमे कुल बजेटके खेलकुदमे ५ प्रतिशत आसपास केल छुट्याईबेर उहीसे नेपालमे पुर्वाधार बन्ना सम्भावना नइरहल ओरसे अब पुर्वाधार निर्माणमे राज्य गम्भीर बने पर्ना ओ पुनः अपने क्यानके नेतृत्वमे अइलेसे प्रधानमन्त्री, खेलकुद मन्त्री, मुलधारके राजनीतिक दलके नेताहे कन्भेन्स करके फे पुर्वाधार बनाके छोरना प्रतिवद्धता व्यक्त करलै ।
तत्कालीन सुदूरपश्चिमाञ्चल विकास क्षेत्रके खेलाडीहुक्रे नेपाली राष्ट्रिय टिममे खेल्न सपना जस्टे रहे, १४ जनहनमे मुस्किलसे ३ जाने सुदूरपश्चिमके हुइट ओ ओइनेफे प्लेङ ११ भिटर पढ्न सम्भावना कम हुए उहे दुख लग्टीक अवस्था अपने टुलुटुलु हेरे नइसेक्के आजसे १९ वर्ष आघे बहुट संघर्ष करके क्षेत्र न .५ नेपालगन्जसे टुक्राके क्षेत्र न. ६ बैतडी बनाइल अध्यक्ष चन्द बटैलै ।
उहाँ अब्बे नेपाली राष्ट्रिय क्रिकेटमे ४० प्रतिशत योगदान सुदूरपश्चिमसे करटी रहल बटैलै । विभागीय टिममेफे २५ जाने खेलाडी सुदूरपश्चिमके रहल अध्यक्ष चन्द बटैलै । उहाँ उमेर समूह, महिला, पुरुष ओ सिनियर टिममे सुदूरपश्चिमके खेलाडी डेखके अपने बहुट खुसी हुइना करल बटैटी यी क्षेत्रके खेलाडीके लाग अपन ओरसे सेक्ना सहयोग कैना प्रतिवद्धता समेत व्यक्त करलै । उहाँ साधारणसभामे सिंगो देशके क्रिकेट स्टेक होल्डर पुनः अपनहे नेतृत्वमे नन्ना सकारात्मक रहल बेला अपन गृहक्षेत्र अपन विरुद्ध जाई नइसेक्ना बटैलै ।
हम्रे सुदूरपश्चिमबासी निर्णायक परिस्थितिमे जबफे एकढिक्का हुइल बटी । अइना महाधिवेशनमे सुदूरपश्चिम प्रदेशके १६ मत बा उ कहु दायाँबायाँ नइहुके अपने पक्षमे अइना अध्यक्ष चन्द बटैलै । साधारण सभामे सुदूरपश्चिम प्रदेशके ८ जिल्लाके प्रतिनिधि सहभागी बटै ।
–
–
