धनगढीमे टिसरा हार्डवेयर एक्सपो हुइटी

पहुरा समाचादाता
धनगढी, २६ भदौ । कैलालीके धनगढीमे टिसरा हार्डवेयर एक्सपो आयोजना हुइना बा । हार्डवेयरके व्यापार प्रवद्र्धन ओ टमान राष्ट्रिय तथा अन्तर्राष्ट्रिय कम्पनीके उत्पादनके प्रचार–प्रसार कैना उद्देश्यके साथ हार्डवेयर एक्सपो आयोजना करे लागल मंगरके पत्रकार सम्मेलन करके जनाइल बा ।

हार्डवेयर एक्सपो अइना कुवाँर १० से १४ गतेसम धनगढीके सौँराइ स्क्वायरमे आयोजना हुइना आयोजक कैलाली हार्डवेयर संघ जनैले बा । हार्डवेयर एक्सपोमे स्वदेशी तथा विदेशी कम्पनीके उत्पादन बारेमे विस्तृत जानकारी डेना संघके अध्यक्ष कुवेरबहादुर शाही बटैलै ।

उहाँके अनुसार प्रदर्शनीमे निर्माणके लाग चहना सरिया, सिमेन्ट, सेक्सन, जिआई तार, सेनेट्री टायल्स तथा होम डेकोरके लाग चहना सक्कु सामान धारजाई । यी वस्तुके गुणस्तर ओ मूल्यबारेमे प्राविधिक पक्ष हेर्ना इन्जिनियर, आर्किटेक्ट्स, इन्टेरियर डिजाइनरसे अवलोकनकर्ताहे जानकारी डेना जानकारी डेहल बा ।

निःशुल्क प्रवेश रहन एक्सपोमे सक्कु निर्माण सामग्री तथा हार्डवेयर कम्पनीके करके ५० ठो ढेर स्टल रहना आयोजक जनैले बा । एक्सपोमे नयाँ प्रविधि, उपकरण, मेसिनके जानकारी डेना बा । ओस्टेक करके, नयाँ निर्माण कैना योजना बनुइयाहे आवश्यक परामर्श डेना, भूकम्प प्रतिरोधी निर्माणसम्बन्धी जानकारी डेना जनाइल बा ।

एक्सो अवधिभर टमान कम्पनीके हार्डवेयर सामग्री खरिद करेबेर ५ से ५० प्रतिशतसम छुट डेना अध्यक्ष शाही बटैलै । एक्सोमे बिटुबी सेमिनार कैना ओ दर्शक आकर्षित करेक लाग पुरस्कारके व्यवस्थासमेत कैना आयोजक जनैले बा ।
संघसे २०७५ से कैलालीमे हार्डवेयर एक्सपो आयोजना करटी आइल बा । एक्सपो आयोजनासे टमान मल्टिनेशनल कम्पनीके सुदूरपश्चिम प्रदेशप्रतिके दृष्टिकोणमे परिवर्तन आइल संघके निवर्तमान अध्यक्ष सुरेन्द्र राठी बटैलै ।