थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०५ असार २६४८, मंगर ]
[ वि.सं ५ असार २०८१, मंगलवार ]
[ 18 Jun 2024, Tuesday ]
‘ कैलारीमे थारु पहिरनसहित वृहत अँटवारीके शुभकामना अदानप्रदान ’

मौलिक संस्कृतिहे जर्गेना कैनामे जोड

पहुरा | २९ भाद्र २०८०, शुक्रबार
मौलिक संस्कृतिहे जर्गेना कैनामे जोड

पहुरा समाचारदात
हसुलिया, २९ भदौ ।
कैलाली जिल्लाके कैलारी गाउँपालिकामे हसुलियामे थारु पहिरनसहित बृहत अँटवारी शुभकामना अदानपदान कार्यक्रम कैगिल बा ।

‘रिति संस्कृति हमार पहिचान, यिहिहे बचैना हमार अभियान’ कना मुल नाराके साथ कैलारी गाउँपालिकाके आर्थिक सहयोगमे थारु कल्याणकारिणी सभा कैलारी गाउँपालिका कार्यसमिति ओ नेपाल साँस्कृतिक महासंघ कैलारी गाउँपालिका कार्यसमितिके संयूक्त आयोजनामे थारु पहिरनसहितके सहभागितामे वृहत शुभकामना अदानप्रदान कार्यक्रम कैगिल हो ।

कैलारी गाउँपालिकाके अध्यक्ष तथा कार्यक्रमके वडका पहुना राजसमझ चौधरी छोट देशमे टमान जातजातीके बसोबास रहलमे थारु समुदाय संस्कृतिमे सबसे धनी रहल बटैलै । उहाँ कहलै, ‘जटराफे कार्यक्रम हुइठ वहाँ थारु समुदायके संस्कृति विना उ अधुरा रहठ । देशके विकास संग्गे रिति संस्कृतिकेफे विकास हुइटा, मने मौलिक संस्कृतिहे जोगैटी विकृति डेखल संस्कृतिहे सुधार करके लैजाई पर्ना बा ।’ अपन रितिसंस्कृति छोरके औरके संस्कृति नइअङल्गना, रिति संस्कृति जोगाइक लाग बहुट ध्यान डेहे पर्ना उहाँ बटैलै ।

हमार पुरान गरगहना, गानाबजाना लोप हुइटा,’ गाउँपालिका अध्यक्ष कहलै, ‘हम्रे आब गम्भीर हुइना जरुरी बा । अब्बे पुरान संस्कृति जोगैना कोसिश कैजाइटा, युवा पिढी टमान मेरिक लौवा लौव गितबाँस निकारटै मने मौलिक संस्कृतिहे विस्राई नइपरल ।’ थारु समुदायके खास–खास टिहुवारहे संस्थागत करेक लाग मिल्के जाई पर्ना यकर लाग कैलारी गाउँपालिका सहयोग कैना तत्पर रहल उहाँ बटैलै ।

गाउँपालिका उपाध्यक्ष तथा कार्यक्रमके विशिष्ट पहुना भगवतीकुमारी चौधरी परम्परासे अँटवारी टिहुवार मनैटी आइल बटैली । उहाँ कहली, अष्टिम्की, अँटवारीमे हमार अग्रसान डेना चलन बा, अपन घर जैसिन रहलेसेफे लैहर घरसे आइल पहुरामे माया ममता रहठ । खैना चिजसंग्गे डाईबाबक, घरपरिवारके सन्देशफे संग्गे जैना करठ ।’ अग्रासनमे घरपरिवारके माया कबु नटुटे कना सन्देशफे रहल गाउँपालिका उपाध्यक्ष बटैली ।

कार्यक्रममे विशिष्ट पहुना रहल थारु कल्याणकारिणी सभाके केन्द्रीय सदस्य रामचरण चौधरी टिहुवारहे संरक्षण करेक लाग सक्कु जाने अँटवारी टिहुवार मनैना आग्रह करलै । उहाँ कहलै, ‘हम्रे ब्रत रही चाहे न रही, अपन घरेक रोटी भात हुइलेसेफे डिडिबाबुन, फुईहे डेहे जाई । माया ममता गाँसेक लागफे डेहे जैना चलन लगैना चाही ।’

थारु समुदायके पोशाकमे चमक बा, जादु बा, लगैलेसे सक्कु जाने जवान डेखैबो,’ उहाँ कहलै, ‘कैलारी गाउँपालिकामे आब टरटिहुवारमे हुइलेसेफे लगैना चलन बैठाई परल । संस्कारहे संस्कृतिहे बचाइक लाग हर टिहुवारहे अपन पोशाक लगाई परल ।’
थारु समुदायके पोशाकप्रति गैरथारु ओ विदेशीफे आर्कषित हुइल उहाँ बटैलै । हम्रे अपन संस्कृति संस्कार बचाँब कलेसे यहाँ नमुना पालिका बनाई सेक्नाफे उहाँ बटैलै ।

विशिष्ट पहुना रहल थारु कल्याणकारिणी सभाके केन्द्रीय सदस्य इन्दु थारु कैलारी गाउँपालिका पहिल बार थारु भाषामे सूचना जारी करटी दुई दिन अँटवारीके विदा घोषणा, ओ पहिल चो थारु पहिरनमे सामुहिक रुपमे अँटवारी टिहुवार मनैटी शुभकामना अदान प्रदान कैके ऐतिहासिक बनाइल बटैली । अभिनसम टमान पालिका थारु भाषाहे काम काजी बनैना कहल, मने अपन करल निर्णय अपनही कार्यान्वयन करे नइसेकल रहे । कैलारी गाउँपालिकासे अब्बे थारु भाषामे सूचना जारी करल यी ऐतिहासिक हो ।

संस्कृति कलेसे गानाबजानाके केल नइहो, उहाँ कहली, ‘संस्कृतिसंग खाना, जीवन पद्धति जोरल बा, संस्कृतिसंग शिक्षा, कलाफे जोरल बा । यिहीहे नइबचाँब कलेसे हमार पहिचान का हो भावी पुस्ता पत्ता नइपैही ।’ मौलिक संस्कृतिहे दस्तावेजीकरण करटी जैनामेफे उहाँ जोड डेली ।

थारु कल्याणकारिण्ी सभा कैलालीके कार्यबाहक सभापति माधव थारु कैलारी गाउँपालिकासे थारु भाषामे सूचना जारी करलमे धन्यवाद डेटी यिहीहे निरन्तरता डेना आग्रह करलै ।

कार्यक्रममे थारु कल्याणकारिणी सभा क्षेत्र नम्बर ३ क्षेत्रीय सभापति कृष्णाप्रसाद चौधरी, थाकासके अजीवन सदस्य सोनुराम चौधरी, वडा नम्बर ४ वडा अध्यक्ष ठागुराम चौधरी, थारु विद्यार्थी समाजके जिल्ला अध्यक्ष आशिष चौधरी, नेपाल सांस्कृतिक महासंघ कैलारी गाउँपालिका अध्यक्ष सविता थारुलगायत मन्तव्य व्यक्त करटी थारु कला, संस्कृति सरक्षणमे जोड डेहल रहिट ।

थारु गीतबाँस संरक्षणमे टेवा पुगैटी आइल कविता चौधरी थारु समुदायके हरेक नाँचसंग्गे गीत जोरल मने अब्बे नाँचके सरंक्षण हुइलेसेफे गीतभर हेरैटी गैल बटैली उहाँ अँटवारीसंग जोरल सन्देशमुलक कविताफे प्रस्तुत करल रही ।

थारु कल्याणकारिणीसभा कैलारी गाउँपालिका कार्यसमितिके अशोक चौधरीके अध्यक्षतामे हुइल कार्यक्रममे नेपाल सांस्कृतिक महासंघ कैलारी गाउँपालिका सदस्य तुल्सी चौधरी अँटवारी टिहुवारबारे जानकारी डेहल रहिट । कार्यक्रमके संचालन मञ्जु चौधरी करले रही ।

अँटवारीके शुभकामना अदानप्रदान कार्यक्रममे थारु संस्कृति झल्कना शखिया, झुम्रा नाँच, आधुनिक एकल नाँच, सामुहिक नाँच डेखगिल रहे । अँटवारी टिहुवार कैजैना ब्रत खोल्नाके साथे अग्रसानफे डेहे जागिल रहे । कार्यक्रममे कैलारी गाउँपालिकाके १ से नौ वडाके वडा अध्यक्ष, कार्यपालिका सदस्य, वडा सदस्य, टमान गाउँसे डिडिबहिनीया भल्मन्सालगायत गाउँपालिकाके कर्मचारीहुकनके सहभागिता रहे ।

जनाअवजको टिप्पणीहरू