थारु कल्याणकारिणी सभा कैलालीके सभापतिमे विर बहादुर चौधरी विजयी
पहुरा समाचारदाता
धनगढी, १३ कुवाँर । थारु कल्याणकारिणी सभा कैलालीके सभापतिमे विरबहादुर चौधरी विजयी हुइल बटै । उहाँ अपन प्रतिद्धन्दी दिलबहादुर चौधरीसे ३ मतसे विजयी हुइल हुइट । सभापतिमे विजयी हुइल विरबहादुर चौधरी १५३ मत नन्लै, हुकान प्रतिद्धन्दी दिलबहादुर चौधरी १५० मत नन्लै । ओस्टेक सभापतिमे उम्मेदवार देशराम चौधरी २ मत प्राप्त करले बटै ।
उपसभापतिमे विजयी हुइल चुनीराम चौधरी १८७ ओ दुसरा विजयी उम्मेदवार लक्ष्मण चौधरी १५६ मत नन्लै । तीन ठो उपसभापति चाहलमे एक जाने महिला सुस्मिता चौधरी पहिले निर्विरोध निर्वाचित हुसेकल रही । ओस्टेक उपसभापतिके उम्मेदवार बतासु चौधरी१३६ मानबहादुर चौधरी २० मत प्राप्त करले बटै ।
सचिवमे बुधराम चौधरी १६० मत नानके विजयी हुइल बटै । हुकान प्रतिद्वन्दी बसन्ती चौधरी १४३ मत प्राप्त करले बटी । सहसचिवमे विनोद चौधरी विजयी हुइल बटै । उहाँ १५२ मत नान्के विजयी हुइल हुइट । उहाँक प्रतिद्वन्दी रतन चौधरी १२८ मन प्राप्त करले बटै ।
ओस्टे करके कोषाध्यक्षके दिव्य प्रिसासी चौधरी १६१ मत नान्के विजयी हुइल बटी । हुकान प्रतिद्वन्दी सुनिता चौधरी १३६ मत प्राप्त करले बटी ।
थारु कल्याणकारिणी सभा कैलालीके गैल कुवाँर ६ गते कैलारी गाउँपालिकाके हसुलियामे नवौ जिल्ला अधिवेशन सुरु हुइल रहे । उ रोज उदघाटन कार्यक्रम ओ बन्दशत्र करेबेर रात ११ बजलपाछे चुनाव कुवाँर १३ गते सारल रहे ।
