पेट्रोलियम पदार्थमे फेर मूल्यवृद्धि
काठमाडौ, १४ कुवाँर । नेपाल आयल निगमसे पेट्रोलियम पदार्थके मूल्य वृद्धि करले बा ।
शनिच्चर बैठल निगम सञ्चालक समितिके बैठकसे पेट्रोलमे प्रतिलिटर २, डिजेल ओ मट्टितेलमे प्रतिलिटर ६ ओ खाना पकैना ग्यासमे प्रतिसिलिण्डर २१५ रुप्या बढैना निर्णय करल हो । ओस्टेक हवाइ इन्धन आन्तरिक ओ अन्तर्राष्ट्रिय दुनुमे प्रतिलिटर ८ रुप्या बढाइल बा ।
यी वृद्धिसंगे ग्याँसके मूल्य प्रतिसिलिण्डर २११० रुप्या पुगल बा । पेट्रोलके मूल्य पहिल वर्ग (चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी ओ वीरगञ्ज डिपोसे बिक्री हुइना ठाउँ) मे प्रतिलिटिर १८२.५ रुप्या, दुसरा वर्ग (सुर्खेत ओ दाङ) मे १८४ रुप्या ओ काठमाडौं, पोखरा ओ दिपायलमे १८५ रुप्या पुगल बा ।
ओस्टेक करके डिजेलको मूल्य पहिल वर्गमे १७६.५, दुसरा वर्गमे १७८ ओ टिसरा वर्गमे १७९ रुप्या प्रतिलिटर कायम हुइल बा । आन्तरिकओरके हवाइ इन्धनके मूल्य प्रतिलिटर १४४ रुप्या ओ अन्तर्राष्ट्रियके मूल्य १.०९५ अमेरिकी डलर कायम हुइल बा ।
