कैलारी–५ मे जग्गाके निस्सा वितरण सुरु
पहुरा समाचारदाता
हसुलिया, १४ कुवाँर । कैलाली जिल्लाके कैलारी गाउँपालिका वडा नम्बर ५ बन्दरगौरहीके भूमिहिन दलित, भूमिहिन सुकुम्बासी, अव्यस्थित बस्ती, मुक्तकमैया परिवारहे जग्गाके निस्सा वितरण कैगिल बा ।
वडा नम्बर ५ के भूमिहिनहुकनहे निस्सा वितरण कार्यक्रम अँटवारके रोज बन्दरगौरहीसे सुरुवाट करल कैलारी गाउँपालिका वडा नम्बर ५ के वडा अध्यक्ष विष्णुप्रसाद चौधरी बटैलै । वडा नम्बर ५ मे ७ सय ३ जनहनहे जग्गाके निस्सा वितरण कैना लक्ष्य लेके सुरुवाट कैगिल पहिल रोज ३२ जन भुमिहिन, मुक्तकमैया, अव्यस्थित, दलित समुदायके परिवारहे जग्गाके निस्सा वितरण करलक उहाँ जनैलै । ओस्टेक आज (सोम्मार) वडा नम्बर ५ स्थित मुक्तकमैया बस्ती सपना शिविरके मुक्तकमैयनहे जग्गाके निस्सा वितरण कैना वडा अध्यक्ष बटैलै ।
अपनेहुक्रे नम्मा समयसे बैठल जग्गाके कौनो प्रमाण नइरहल मने उ जग्गाके आज निस्सापाइलपाछे खुशी लागल महेश्वर कुमाल बटैलै । निस्सा वितरण वडा सदस्य भागुदास चौधरी, अनारकली चौधरी, पवित्रा परियार, मानबहादुर चौधरी, कार्यपालिका सदस्य, मनिराम कुमाल, वडा सचिव सोनुराम चौधरीलगायतसे कैगिल रहे ।
