थारु महिलनहे ढकिया बिन्ना तालिम

पहुरा समाचरदाता
हसुलिया, १५ कुवाँर । कैलाली जिल्लाके कैलारी गाउँपालिकामे सोम्मारसे थारु महिलाहुकनहे ढकिया, डेलुवा ओ बास्केट बिन्ना तालिम डेजैटी रहल बा ।

कैलारी गाउँपालिका रोजगार सेवा केन्द्रके आयोजना ओ पारदर्शि महिला विकास बहुउद्देश्यीय सहकारी संस्था लिमिटेड हसुलियाके सहकार्यमे सुरु हुइल १५ दिने ढकिया, डेलुवा ओ बास्केट बिन्ना तालिमके उदघाटन कैलारी गाउँपालिकाके अध्यक्ष राजसमझ चौधरी करल रहिट ।

उदघाटन कार्यक्रममे बोल्टी उहाँ ढकिया बिन्ना थारु समुदायके पहिलेक सीप रहल मने बहुट जैसिन महिलाहुकनहे अभिनफे बिने नइजन्ना ओरसे तालिम लेके व्यावसायिकता ओर लैजाई पर्नामे जोर डेहल रहिट । उहाँ कहलै, ‘ढकिया, डेलुवाहे मजासे बिनके सजैलेसे ढेर रुप्यामे विक्री करे सेक्जाइठ । जिहीसे आर्थिक स्रोत बह्रैनामे सहयोग पुगाई सेकठ ।’ प्लाष्टिक भाडा आइलपाछे ढकिया, छिटवा, छिटरलयागत विस्थापित हुइल अध्यक्ष बटैलै ।

कार्यक्रममे गाउँपालिका उपाध्यक्ष भगवतीकुमारी चौधरी ढकिया थारु समुदायके पहिचानसे जोरल ओरसे यिहीहे प्रवद्र्धन कैना आवश्यक रहल बटैली । ढकिया समुदायके हरेक घर रना ओ टमान चिज धारक लाग प्रयोगमे आइल उहाँ बटैली ।

१५ दिने ढकिया, डेलुवा ओ बास्केट बिन्ना तालिममे १६ जाने थारु महिलाहुँक्रनके सहभागिता रहल पारदर्शि महिला विकास बहुउद्देश्यीय सहकारीके अध्यक्ष गीता चौधरी बटैली । कार्यक्रमके संचालन कैलारी गाउँपालिकाके महिला तथा बालबालिका शाखा प्रमुख बालकुमारी चौधरी करल रहिट । उ ढकिया, डेलुवा ओ बास्केट बिने सिखैना काम प्रशिक्षण करिश्मा चौधरीसे करजैटी रहल पारदर्शि महिला विकास बहुउद्देश्यीय सहकारीके व्यवस्थापक कौशीकुमारी बोहरा बटैली ।