तिलकहनीपुर कृषक सहकारीके १४औ बार्षिक साधारणसभा

जीवन चौधरी
पहलमानपुर, १५ कुवाँर । कैलालीके घोडाघोडी नगरपालिका वडा नम्बर ११ मे रहल तिलकहनीपुर कृषक सहकारी सस्था लिमिटेडके १४औं बार्षिक साधारणसभा तथा सार्वजनिक कार्यक्रम हुइल बा ।

प्रदेशसभा सदस्य माननीय खुशीराम चौधरीके वडका पहुनामे हु्इल कार्यक्रममे उहाँ इमान्दारितासे सहकारी चलैलेसे दिगो रना बटैलै । उहाँ कहलै, कमाइल पैसा बचत करे सेक्लेसे भविष्यके कौनो मोडमे भारी काम लागे सेकठ ।’ प्रदेशसभा सदस्य चौधरी बास्ताविक किसान अनुदानसे बञ्चित रहल बटैलै । उहाँ वडा नम्बर ४ बडुली चौर गाउँमे अभिन लडियक पानी पिए पर्ना बाध्य रहल बटैलै ।

घोडाघोडी नगरपालिकाके नगर प्रमुख खडकबहादुर रावत सहकारी किसानहुकनके बखारी रहल बाट बटैलै । उहाँ सहकारीसे यूवाहुकनके रोजगारी डेहल बटैलै । घोडाघोडी–११ के वडा अध्यक्ष दानसिंह जोगी प्रदेश सरकारहे तिलकहनीपुर खेलमैदानहे तारबारके लाग बजेट विनियोजना कैना आग्रह करलै ।

सहकारीके निवर्तमान अध्यक्ष धनिराम चौधरी सहकारीहे दिगोपनामे ध्यान डेना बटैलै । समाजसेवी राजकुमार कठरिया सहकारीहे दिगो बनैना सक्कु जानेक साथ सहकार्य रहे पर्ना बटैलै । घोडाघोडी–११ के वडा सदस्य उमेश कुश्मी शुभकामना मन्तव्य व्यक्त करल रहिट ।

कार्यक्रममे आय व्यय विवरण सहकारीके व्यवस्थापक विशेश्वर चौधरी करल रहिट । सहकारीके अध्यक्ष रुपलाल चौधरीके अध्यक्षतामे हुइल कार्यक्रममे संचालन रामप्रसाद चौधरी करल रहिट ।